NBA-ի պաշտոնական կայքից տեղեկանում ենք, որ «Լոս Անջելես Լեյքերս»-ի պաշտպան Քոբի Բրայանտը հայտնվել է NBA-ի պատմության ամենաարդյունավետ 10 բասկետբոլիստների թվում: Հունվարի 4-ին «Դեթրոյթ Փիսթոնս»-ի հետ խաղում Քոբին վաստակեց 17 միավոր և իր կարիերայի ընթացքում վաստակած միավորների թվով գերազանցեց Դոմինիկ Ուիլքինսին: Ընդհանուր առմամբ Բրայանտը վաստակել է 26671 միավոր: 32-ամյա բասկետբոլիստը NBA-ում հանդես է գալիս 1996 թվականից և մինչև այսօր մասնակցել է 1056 հանդիպման: Ստացվում է, որ նա մեկ խաղի ընթացքում միջինը վաստակում է 25.3 միավոր: Եթե Բրայանտը շարունակի մեկ խաղում նույնքան միավոր վաստակել և մասնակցի առաջնության մնացած 47 հանդիպումներին, ապա այս մրցաշրջանի վերջին նրա ակտիվում կլինի 27863 միավոր, որը թույլ կտա նրան բարձրանալ 6-րդ հորիզոնական: NBA-ի պատմության լավագույն երեք ռմբարկուներն են` Քարիմ Աբդուլ-Ջաբարը (38387 մ.), Կարլ Մելոունը (36928 մ.) և Մայքլ Ջորդանը (32292 մ.):