ԱՄՆ ՄԶԳ «Մրցունակ մասնավոր հատված Հայաստանում» (CAPS) ծրագրին փոխարինելու եկած «Ձեռնարկությունների զարգացման և շուկայի մրցունակության» (ՁԶՇՄ) հնգամյա ծրագրի մեկնարկը պաշտոնապես տրվեց այսօր: Հիշեցնենք, որ 2011-ի ամռանը ամերիկյան «Պրագմա» կորպորացիան հաղթել էր ԱՄՆ ՄԶԳ մրցույթում և, ինչպես «Առաջին լրատվական»-ին հայտնել էր կորպորացիայի փոխնախագահ Ջոն Դիֆայնը, ծրագրի մեկնարկի մասին պետք է հայտարարվեր դեռ 2011-ի սեպտեմբերի վերջին:
ԱՄՆ ՄԶԳ հայաստանյան ներկայացուցչության ղեկավար Ջաթինդեր Չիման այսօր շնորհանդեսի ժամանակ ծրագրի հաջողության առումով կարևորեց մասնավոր սեկտորի հետ համագործակցությունը: «Այս ծրագիրն առաջինն է տարածաշրջանում»,- նշեց Ջ. Չիման:
ՀՀ-ում ԱՄՆ դեսպան Ջոն Հեֆերնը Հայաստանի զարգացման առումով առանձնացրել է տնտեսության զարգացումը, արդար ընտրությունների անցկացումը և խորը համապարփակ առևտրային հարաբերությունները: Նա համոզվածություն է հայտնել, որ առևտրային հարաբերություններում հնարավորությունների սահմանը դեռ հեռու է, և հարաբերությունների զարգացման համար կարևորել է ՀՀ-ում գործարար միջավայրի բարելավումը, տնտեսական մրցակցության առկայությունը և օտարերկրյա ներդրումների խթանումը:
ՀՀ էկոնոմիկայի նախարար Տիգրան Դավթյանի բնորոշմամբ՝ սա «խոստումնալից» ծրագիր է, որը նպաստելու է ձեռնարկությունների զարգացմանն ու տնտեսական մրցունակության բարձրացմանը: Նախարարը նշեց, որ անցած շուրջ 20 տարիների ընթացքում մեր երկրում շատ բան է փոխվել, և այսօր մեր երկրի տնտեսության խնդիրները այլ են:
Նշենք, որ ԱՄՆ ՄԶԳ այս նոր ծրագիրը նպատակ ունի զարգացնել արժեշղթաներ՝ մրցունակության բարձրացման և ներդրումների ավելացմանը նպաստելու համար: Այն իրականացնելու է աշխատաշուկայի ուսումնասիրություններ՝ ապահովելու համար որակյալ աշխատուժ արժեշղթաների համար, հիմնադրելու է ձեռնարկատիրության և գործարար կառավարման զարգացման կենտրոն, աշխատելու է բանկային համակարգի հետ՝ ֆինանսավորումը կազմակերպությունների համար ավելի հասանելի դարձնելու համար, հատկացնելու է 500 հազար-3 մլն դոլար գումարի վարկավորում և այլն:
