ԱԺ-ում այսօր մեկնարկած համամասնական ընտրակարգի վերաբերյալ խորհրդարանական լսումներին ելույթ ունեցավ «Ժառանգություն» խմբակցության պատգամավոր Արմեն Մարտիրոսյանը և հայտարարարեց՝ ոչ ոք չի ասում, որ մեծամասնական ընտրակարգը վատն է. «Բայց Հայաստանում մեծամասնական ընտրակարգով ընտրվածները ֆեոդալներ են»` հավելելով, որ հարցը քաղաքական դաշտում է:
ԱԺ փոխնախագահ Սամվել Բալասանյանն իր ելույթում նշեց, որ չի խոսում խմբակցության անունից. «Սակայն մենք ստորագրել ենք առաջարկի տակ, ըստ որի՝ կողմնակից ենք հարյուր տոկոսանոց համամասնական ընտրակարգին»:
ՀԱԿ համակարգող Լևոն Զուրաբյանն իր ելույթում նշեց, որ ՀՀ-ի այսօրվա աղետալի վիճակի պատասխանատուն քրեաօլիգարխիկ համակարգն է. «Փետրվարի 12-ին մեր ժողովուրդը ստացավ ևս մեկ ապացույց, որ իշխանությունները ոչ մի դաս չեն քաղել անցյալից և կրկին պատրաստ են դիմել զանգվածային բռնությունների ու կեղծարարության, վարչական ռեսուրսի օգտագործման` միայն թե պահպանեն ոչ լեգիտիմ իշխանությունը: Մենք եկել ենք այս լսումներին, քանի որ երկիրը ակնկալում է արմատական լուծումներ»,- նկատեց նա` հավելելով, որ արատավոր ընտրական համակարգի պատճառով վտանգված է երկրի զարգացումը, ժողովուրդը օտարված է իշխանությունից, և մարդիկ լքում են երկիրը ոչ այնքան սոցիալ-տնտեսական իրավիճակի պատճառով, որքան այն պատճառով, որ դադարել են մասնակից լինել սեփական երկրի կառավարմանն ու կառուցմանը: «Իշխանությունը այսօր ընկալվում է որպես բռնազավթիչների ավազակախումբ»,- նշեց նա:
Լ. Զուրաբյանը հիմնավորեց, որ մեծամասնական ընտրակարգը Հայաստանում վերածվել է չարիքի, քանի որ իշխանությունները վարչական ռեսուրսն են օգտագործում, կեղծիքներով են փորձում ընտրվել: «Մեծամասնական ընտրակարգի վերացումը կջախջախի ընտրական կոռուպցիայի այս առանցքային օղակը»,- նշեց նա:
Իր ելույթի ավարտին Լ. Զուրաբյանը շեշտեց. «Այսօր բացառիկ շանս ունենք՝ գնալու համաձայնության ճանապարհով: Մի՛ տարեք երկիրը առճակատման: Փորձեք մի քայլ կատարել ընդդիմությանն ու հասարակությանը ընդառաջ: Իսկ եթե նորից համառեք` չզարմանաք հետևանքների համար: Այսօր մենք միայն զգուշացնում ենք, իսկ որոշում եք դուք: Ճիշտ որոշում ընդունեք. դեռ այդ հնարավորությունը ունեք»:
ՀԺԿ կուսակցության անդամ Ֆելիքս Խաչատրյանը նշեց, որ այսօրվա հայաստանյան իրականության շահերից է բխում հարյուր տոկոսանոց ընտրակարգին անցումը, քանի որ ընտրակաշառքով են ընտրությունների տանում մարդկանց:
«Մեծամասնական ընտրակարգը մեր իշխանությունների համար մինչև ընտրությունները ապահովում է ընտրության արդյունքները, քանի որ Հայաստանը բաժանված է մասերի»:
ՀՅԴ խմբակցության պատգամավոր Վահան Հովհաննիսյանը իր ելույթում նկատեց, որ իշխանությունները փաստարկում են, թե ընդդիմությունը ուրիշ խնդիր չի տեսնում այս երկրում, նաև ասում են, թե շատ քիչ ժամանակ է մնացել մինչև ընտրությունները, և հաջորդը` կապը կկտրվի ընտրողի և պատգամավորի միջև:
«Մի ցուցակ եմ պատրաստել, մեծամասնական ընտրակարգով ընտրված շատ պատգամավորներ նույն այդ տարածքների բնակիչ չեն, անգամ մարդիկ չեն ճանաչում իրենց պատգամավորին: Լավ է, որ այստեղ չեն էլ խոսում, այդ մարդիկ իրենց պատգամավորին չեն էլ ճանաչի»,- նշեց Վ. Հովհաննիսյանը:
