Ինչպես փոխանցում է Fox News-ը, WikiLeaks-ը հրապարակել է ԱՄՆ Պետքարտուղարության գաղտնի հաղորդագրություններից մեկը, համաձայն որի Իրանի նախագահ Մահմուդ Ահմադինեժադը փորձել է համաձայնության գալ ամերիկացիների հետ` միջուկային վառելիքի առաքման վերաբերյալ: Դա տեղի է ունեցել 2009թ.-ին: Associated Press գործակալության փոխանցմամբ, փաստաթղթում նշված է, որ Իրանի նախագահն ավելի վստահում է ամերիկացիներին, քան ռուսներին: Ըստ աղբյուրների` Իրանը համաձայն է եղել պատրաստի միջուկային վառելիքը ստանալ Միացյալ Նահանգներից: Իրանական կողմի առաջարկները ԱՄՆ-ի իր գործընկերներին է հանձնել Թուրքիայի արտգործնախարար Ահմեդ Դավութօղլուն: Համաձայն հաղորդագրության` Դավութօղլուն ԱՄՆ պետքարտուղարի օգնական Ֆիլիպ Գորդոնին ասել է, որ Իրանի կառավարությունը ցանկանում է քննարկել միջուկային վառելիքի վերաբերյալ պայմանագիր, սակայն Ահմադինեժադը մեծ ճնշման տակ է երկրի ներսում, և որ պայմանագրի ստորագրումը «իրանական որոշ շրջանակների կողմից կդիտվի որպես պարտություն արևմտյան ճնշումների ներքո»:
Դիվանագիտական գաղտնի փաստաթղթում նաև նշվում է, որ թուրքական պաշտոնյաները Ահմադինեժադին համարում են ավելի ճկուն քաղաքական գործիչ, քան իրանական իշխանությունների շատ ներկայացուցիչներ, և որ իրանական կողմն ավելի է «վստահում» ԱՄՆ բանագնացներին, քան բրիտանացիներին, ինչպես նաև կնախընտրեն ստանալ միջուկային վառելիք ԱՄՆ-ից, քան ռուսներից:
Մեկ այլ փաստաթղթում էլ նշվում է, որ Իսլամական հեղափոխության պահապանների ղեկավար Ալի Ջաֆարիի և Ահմադինեժադի միջև լուրջ լարվածություն կա: Մասնավորապես նշվում է, որ քննարկումներից մեկի ժամանակ Ահմադինեժադն առաջարկել է մեծացնել Իրանի քաղաքացիների ազատությունների աստիճանը, և որ դա մեծ խնդիր է երկրի համար, ինչին Ջաֆարին հակադարձել է, որ Ահմադինեժադն ինքն է մեծ խնդիր Իրանի համար, որից հետո ապտակել է նրան: