Հայաստանի սպառողական շուկայում ձվի «դեֆիցիտը» մնաց անցյալում: Այս օրերին այն վաճառվում է անսահմանափակ քանակությամբ` 50-60 դրամի սահմաններում: Սակայն ինչպես խոստովանում են վաճառողուհիները, ձվի գները առաջիկայում անհամեմատ կէժանանան. պատճառը ձվի ավելցուկն է: «Մարդիկ թեթևակի աղմուկի պատճառով քիչ էր մնում ձուն դելիկատես սարքեին: Մեր ժողովուրդը իրոք որ տարօրինակ է. երբ ձվի շուրջ աղմուկը բարձրացավ սպառումը ավելացավ, բայց երբ ձուն սկսեց անսահմանափակ քանակությամբ վաճառվել, սպառումը կտրուկ նվազեց: Մարդիկ մեկ տարվա համար ձու են գնել, ստիպված այդ փչացած ձուն ուտելու են մինչև սպառվի, այնինչ` այսօր արդեն խանութներում անսահմանափակ քանակությամբ ձու է վաճառվում: Մարդիկ աջ ու ձախ ֆինանսական վիճակից դժգոհում են, բայց եթե խոսակցություններ տարածվեն, որ սև ձկնկիթի արտադրանքը նվազել է, բոլորը կշտապեն սև ձկնկիթ գնելու, չնայած այն տարին մեկ համտեսեն, թե ոչ»,- դժգոհեց սուպերմարկետներից մեկի մթերային բաժնի աշխատակիցներից Կարինեն: