Այնպիսի ընտրախախտում, որը կազդեր ընտրությունների վերջնական արդյունքի վրա՝ չի եղել: «Առաջին լրատվական»-ի հետ զրույցում նման տեսակետ հայտնեց ՏԻՄ ընտրություններին դիտորդական առաքելություն իրականացնող «Ազատ հասարակության ինստիտուտ» կազմակերպության նախագահ Էդգար Հակոբյանը`գնահատելով ընտրությունների ընթացքը և գրանցված խախտումները:
Նա նշեց, որ իրենց կազմակերպության դիտորդները ընտրակեղծիքներ չեն արձանագրել: «Հնարավոր է շատ արարքներ որպես խախտում են ընկալվել, բայց դա խախտում չէ Ընտրական օրենսգրքով: Ընդհանուր, ընտրություններն անցել են շատ նորմալ, շատ բնական մրցակցային ֆոնի ներքո, որևիցե լուրջ ընտրախախտում և ընտրակեղծիք չի արձանագրվել, առավել ևս այնպիսի, որ կարող էր ազդել ընտրությունների արդյունքի վրա»,- մեկնաբանեց Է. Հակոբյանը`հավելելով, որ անձնագրում նշվող կնիքները կանխում են կրկնակի քվեարկությունը, դա կիրառելի է, սակայն եթե ընտրությունների ընթացքը նկարահանվում է և փոքր ծավալի ընտրություններ են, վերահսկելի են նաև առանց կնիքի:
Հիշեցնենք, որ փետրվարի 12-ին կայացած ՏԻՄ ընտրություններին դիտորդական առաքելություն են իրականացրել հետևյալ կազմակերպությունները` «Ազատ հասարակության ինստիտուտ» (261 դիտորդ), «Հելսինկյան քաղաքացիական ասամբլեա» (28 դիտորդ), «Երիտասարդություն հանուն ժողովրդավարության» (28 դիտորդ), «Ազատականություն և ժողովրդավարություն» (28 դիտորդ), «Հաշմանդամների «Փարոս» կրթության և մշակույթի զարգացման կենտրոն» (5 դիտորդ), «Հաղթանակի զավակներ» (10 դիտորդ), «Դու մենակ չես» (9 դիտորդ), «Հելսինկյան քաղաքացիական ասամբլեայի Վանաձորի գրասենյակ» (27 դիտորդ):