ՀՀԿ-ական պատգամավոր Արտակ Դավթյանը Հայաստանի նախկին ԱԳ նախարար Վարդան Օսկանյանի՝ ԲՀԿ-ին անդամակցելու փաստն անսպասելի չի համարում: Այս մասին նա ասաց «Առաջին լրատվական»-ի հետ զրույցում:
«Մի որոշ ժամանակ առաջ հրապարակումներ եղան Օսկանյանի՝ ԲՀԿ համամասնական ցուցակի երկրորդ հորիզոնականը զբաղեցնելու մասին, իսկ դրանից առաջ էլ լուրեր էին շրջանառվում, որ նա հակված է ԲՀԿ-ին անդամագրվելուն, որ այդ կուսակցությունը նրա համար այդքան էլ օտար չէ: Թե ինչքանով օտար չէ նրան ԲՀԿ-ն, կարծում եմ, լավագույն ձևով ինքը՝ Վարդան Օսկանյանը կպատասխանի: Թե հոգեհարազատության որ պահերն են ազդել, ավելի լավ ինքը կամ ԲՀԿ-ն կպատասխանեն»,- ասաց Արտակ Դավթյանը:
Նշենք, որ ՀՀ նախկին ԱԳ նախարար Վարդան Օսկանյանը դիմում է ներկայացրել «Բարգավաճ Հայաստան» կուսակցությանն անդամակցելու նպատակով:
«Երեկ ես դիմում եմ ներկայացրել «Բարգավաճ Հայաստան» կուսակցությանն անդամակցելու համար։ Այդ որոշումը կայացրել եմ, քանի որ համոզված եմ, որ «Բարգավաճ Հայաստան» կուսակցությունը, այլ քաղաքական ուժերի հետ միասին, կարող է քաղաքական մրցակցության շնորհիվ ապահովել ազատ և արդար ընտրություններ, հետևաբար նաև նոր խորհրդարան՝ քաղաքական ուժերի նոր դասավորությամբ։ Այսօր գտնում եմ, որ ժամանակն է, որ ավելի ակտիվ մասնակցություն ունենամ երկրի քաղաքական գործընթացներին»,- նշել է Օսկանյանը: