Դատավորի Թովմասյանի նկատմամբ քրեական գործ չհարուցվեց բավական չէ, նրա կողմից ծեծի ենթարկվածն էլ մեկ այլ դատարանում իր անմեղությունն է ապացուցում:
ՀՀ վերաքննիչ քրեական դատարանի դատավոր Եվա Դարբինյանն այսօր մերժեց դատավոր Արման Թովմասյանի նկատմամբ քրեական գործ հարուցելու վերաբերյալ Սամվել Հարությունյանի բողոքը: Ինչպես և սպասվում էր, դատավոր Արման Թովմասյանը ոչ մի պատասխանատվության չի ենթարկվի, իսկ սրա փոխարեն այս պահին Լոռու մարզի ընդհանուր իրավասության դատարանում շարունակվում է Սամվել Հարությունյանի որդու` Աշոտ Հարությունյանի գործով դատավարությունը:
Հիշեցնենք, որ նախկինում Ստեփանավանի առաջին ատյանի դատավոր, իսկ այժմ վարչական դատարանի դատավոր Արման Թովմասյանի և Ստեփանավանի բժշկական կենտրոնի ֆինանսական աուդիտոր Աշոտ Հարությունյանի միջև կենցաղային խոսակցությունից ծագած վեճի հետևանքով հայաստանյան 2 տարբեր դատարաններում էին զուգահեռաբար 2 գործեր քննվում:
Վերաքննիչ ատյանում Աշոտ Հարությունյանի հայրը` Սամվել Հարությունյանը, փորձում էր քրեական գործ հարուցել 2010 թ. նոյեմբերին դատարանի տարածքում չորս կարգադրիչների հետ իր որդուն ծեծի ենթարկած դատավորի նկատմամբ, որն այսօր դատարանը մերժեց, իսկ այս պահին դատավորի փոխարեն, Աշոտ Հարությունյանն է Լոռու մարզի ընդհանուր իրավասության դատարանում փորձում ապացուցել իր անմեղությունը, քանի որ ինքն է մեղադրվում դատավորի նկատմամբ ոտնձգություն կատարելու համար:
Հիշեցնենք, որ դատավորի և քաղաքացու միջև տեղի ունեցած ծեծկռտուքի անմիջապես հաջորդ օրը առավոտյան ոստիկանները ձերբակալել, այնուհետ կալանավորել էին Աշոտ Հարությունյանին, որից հետո նա չորս ամիս կալանքի տակ էր անցկացրել: Աշոտ Հարությունյանի նկատմամբ հարուցվել էր քրեական գործ` սկզբում քր.օր.-ի 316 հոդվածով (Իշխանության ներկայացուցչին խոչընդոտել իր գործողությունները կատարել), հետո փոխել էին խուլիգանության հոդվածով, թե հայհոյել է և այլն: