Թուրքիան, ոչ թե Հայաստանն է ԱՄՆ ռազմավարական գործընկերը, հետևաբար ԱՄՆ նախագահ Բարաք Օբամայի բյուջետային ուղերձը, որում կոչ է արվում 19 տոկոսով նվազեցնել Հայաստանին ցուցաբերվող տնտեսական օգնությունը, իսկ Թուրքիային հատկացվող գումարի չափն ավելացնել, լիովին սպասելի էր. «Առաջին լրատվական»-ի հետ զրույցում այս մասին ասաց ՍԴՀԿ ատենապետ Լյուդմիլա Սարգսյանը:
«ԱՄՆ-ը Ցեղասպանության թեման շահարկում է, միանշանակորեն, ինչ-որ հարցերում Թուրքիային զսպելու, բայց ոչ՝ Ցեղասպանությունը ճանաչելու համար: Այս մոլորությունից պետք է մեկընդմիշտ դուրս գալ:
Երկրորդ, հայտարարություն էր արվել, որ Հայաստանին ֆինանսական օգնություն կտրամադրվի, եթե, իհարկե, նորմալ ընտրություններ անցկացվեն: Հետևաբար, սա ԱՄՆ-ի կողմից ցուցադրական քայլ է, որով նա փորձում է աշխարհին ցույց տալ՝ արվում է ամեն բան Հայաստանում ժողովրդավարության զարգացման համար: Փաստորեն, Հայաստանին տրվող ֆինանսական օգնությունը նվազեցնելով՝ ԱՄՆ հայաստանյան իշխանություններին զգոնության կոչ է անում:
Սա ամերիկյան մեծ խաղի մի փոքրիկ հատվածն է: Բայց սա դեռ չի նշանակում, որ ԱՄՆ-ը մեր երկիրն ուզում է տեսնել ժողորդավար ու զարգացած»,- նկատեց Լյուդմիլա Սարգսյանը:
Նշենք, որ Ամերիկայի Հայ դատի հանձնախմբի (ANCA) կայքի փոխանցմամբ` ԱՄՆ նախագահ Բարաք Օբաման իր բյուջետային ուղերձում կոչ է արել 19 տոկոսով նվազեցնել Հայաստանին ցուցաբերվող տնտեսական օգնությունը:
Սկզբում Օբաման առաջարկել է Հայաստանին ցուցաբերվող օգնությունը կրճատել 32 տոկոսով: Նա առաջարկել է այս տարի Հայաստանին ցուցաբերվելիք 40 միլիոն դոլարի օգնությունը հաջորդ ֆինանսական տարում կրճատել 12,781,000 դոլարով և հասցնել մինչև 27,219,000 դոլարի:
Այս ամենի հետ մեկտեղ Օբաման առաջարկել է Թուրքիային ցուցաբերվող օգնության ծավալն ավելացնել 3.6 միլիոն դոլարով՝ Թուրքիայում միջազգային ռազմական կրթության ծրագրեր իրագործելու համար:
Վրաստանին ցուցաբերվելիք տնտեսական օգնության ծավալը նշված է 42,660,000 դոլար, իսկ Ադրբեջանինը՝ 11,029,000 դոլար: