Վրացական լրատվամիջոցների փոխանցմամբ, Վրաստանի իշխանությունները պատրաստվում են ստուգել հայերի կողմից վրացական ապրանքանիշերի օգտագործման փաստը և այդ ապրանքանիշերն օտարերկրյա շուկաներում որպես հայկական ներկայացնելը:
Այս մասին հայտարարել է «Վրացպատենտի» ղեկավար Իրակլի Գվալաձեն: Նա շեշտել է, որ սա առաջին դեպքը չէ, երբ Հայաստանը յուրացնում է վրացական «բրենդները»:
Այդպիսի օրինակներ հայտնաբերվել են ֆրանսիական շուկայում: Ըստ Գվալաձեի` «այդպիսի օրինակներ եղել են նաև նախկինում: Ինչ վերաբերում է վերոնշյալ փաստին, ապա մենք փորձում ենք ստուգել այդ տեղեկությունը և հակադարձել համապատասխան կերպ: Մասնավորապես, անհրաժեշտ է ստուգել` արդյո՞ք առանձին բրենդներ Ֆրանսիայում ներկայացվել են որպես ապրանքանիշ, թե՞ միայն կրել են այդպիսի անվանումներ»:
Սակայն վրացիների կողմից ներկայացված օրինակները տարօրինակ են, քանի որ դրանք, որքան մեզ հայտնի է, պատենտավորված չեն որևէ ընկերության կողմից և կարող են ազատ օգտագործվել:
Մասնավորապես նշվում է, որ Ֆրանսիայի խանութներում վաճառվում է «Սապերավի» գինի` որպես հայկական ալկոհոլային արտադրանք (սապերավին խաղողի տեսակ է և դրանից արտադրված գինին ոչ մեկի կողմից չի կարող պատենտավորվել), տարակուսանք է հայտնվել թոնրի հացի` հավանաբար լավաշի կամ պուրիի վերաբերյալ, քաղցր սուջուխի վերաբերյալ: Ըստ Եվրոպայում բնակվող վրացիների` վրացական խաչապուրին իբր հայերը վաճառում են խաչատուրիանի անվան տակ:
Թե որքանով են լուրջ այս մեղադրանքները և ինչ ազդեցություն կունենա երկկողմ հարաբերությունների վրա` ժամանակը ցույց կտա: Բայց մեր կարծիքով, այս անհիմն մեղադրանքներին հայկական տնտեսվարողների պատասխանը պետք է արագ լինի: