Հայ ազգային կոնգրեսը փետրվարի 17-ին կայանալիք իր հանրահավաքը հետաձգեց Հրազդանի քաղաքապետի ընտրություններում Սասուն Միքայելյանի պարտության պատճառով. «Առաջին լրատվական»-ի հետ զրույցում նման տեսակետ հայտնեց սոցիոլոգ Ահարոն Ադիբեկյանը:
«ՀԱԿ-ն ուզում էր հանրահավաքի ընթացքում հաղթական ակորդ հնչեցնել, բայց քանի որ Հրազդանում հաղթանակ չգրանցվեց, ապա պետք է թողնի, որ իր «Հաղթանակը սկսվում է Հրազդանից» խոստումը մոռացվի: ՀԱԿ-ն իր մեկնարկը կսկսի ավելի հանգիստ պայմաններում:
Եթե Սասուն Միքայելյանը հաղթեր ընտրություններում, նա շատ մեծ շուքով կնշեր այդ փաստը, բայց այս դեպքում ավելի համեստ գտնվեց: Փաստորեն, Սասուն Միքայելյանը չի բողոքարկել ընտրությունների արդյունքները, ընդունել է դրանք, և հիմա ինչ էլ ասի՝ հետ բերելու ոչինչ չի ունենա»,- ասաց նա:
Սոցիոլոգը նշեց նաև, որ հաջորդ հանրահավաքին, եթե ՀԱԿ-ն այլ ասելիք չունենա, գուցեև անդրադարձ կատարի հրազդանյան ընտրություններին: «Բայց ինձ թվում է՝ խոսելու բան կգտնեն: Հնարավոր է, որ հանրահավաքում խոսվի հրազդանյան ընտրություններից բխող դասերի, իշխանական ռեսուրսին հաղթելու ճիգերի մասին»,- ասաց Աբիբեկյանը:
Նշենք, որ փետրևվարի 12-ին կայացած Հրազդանի քաղաքապետի ընտրություններում ՀԱԿ ներկայացուցիչ Սասուն Միքայելյանը պարտվել էր գործող քաղաքապետ, ՀՀԿ-ական Արամ Դանիելյանին:
