Ամերիկյան Լոս Անջելես քաղաքում սկսվել են Մայքլ Ջեքսոնի մահվան հանգամանքները պարզելու համար դատական լսումները, որտեղ որոշ մանրամասներ են բացահայտվել հայտնի փոփ-երգչի վերջին օրերի և ժամերի վերաբերյալ: Դատարանը նաև կփորձի պարզել, թե որքանո՞վ են բժշկի սխալները նպաստել երգչի մահվանը:
Ջեքսոնի թիկնապահ Ֆահիմ Մուհամադը դատարանում հայտնել է, որ վերջին անգամ Ջեքսոնին տեսել է բաց աչքերով և բերանով պառկած, իսկ նրան բուժող բժիշկ Մյուրեյը խուճապահար փորձում էր օգնություն ցուցաբերել: Թիկնապահը նաև ասել է, որ Մյուրեյն իրեն հարցրել է, թե արդյո՞ք կա մեկը, որ կարող է սրտի ուղղակի մերսում կատարել: Թիկնապահը նաև տարակուսանք է հայտնել, թե ինչու Մյուրեյը 911 չի զանգել:
Երբ հայտարարվել է Ջեքսոնի մահվան մասին, Մյուրեյը լքել է երգչի բնակարանը` հայտարարելով, թե քաղցած է:
Ջեքսոնի պարուսույցն էլ ասել է, որ մահվանից մի քանի օր առաջ երգիչն իրեն շատ վատ էր զգում, սակայն բուժող բժիշկը չէր արգելում շրջագայությունից առաջ սկսված փորձերը: