Հայաստանում Ամերիկայի Միացյալ Նահանգների դեսպան Ջոն Հեֆերնը այսօր բավական հետաքրքրական գնահատական է տվել Հրազդանի քաղաքապետի ընտրությանը: Հիշեցնենք, որ այդ ընտրությանը գործող քաղաքապետ, ՀՀԿ-ական Արամ Դանիելյանը հաղթել էր Հայ ազգային կոնգրեսի ներկայացուցիչ Սասուն Միքայելյանին՝ 1573 ձայնի տարբերությամբ:
Հիշեցնենք նաև, որ Հայ ազգային կոնգրեսը հայտարարել էր ընտրախախտումների մասին և իշխանությունից պահանջել էր անվավեր ճանաչել ընտրությունների արդյունքները, ընդ որում ոչ միայն Հրազդանի, այլ նաև այդ օրը ՏԻՄ 39 համայնքներում անցկացված ընտրությունների արդյունքները: Եվ ահա այդ ֆոնին Միացյալ Նահանգների դեսպանը Հրազդանի քաղաքապետի ընտրությունը գնահատում է մրցակցային և գոհունակություն հայտնում դրա ընթացքից: «Ինձ համար իսկապես հետաքրքիր էր իրական քաղաքական մրցակցություն տեսնել այստեղ, ինչը, իմ կարծիքով, շատ կարևոր է նաև առաջիկա [խորհրդարանական] ընտրությունների համար», ասել է դեսպան Հեֆերնը, նաև նշելով, որ ընտրության օրն անձամբ եղել է Հրազդանում և խոսել երկու կողմի ներկայացուցիչների հետ էլ ստանալով ընտրության ընթացքի նորմալության հավաստիացում:
Դեսպանը հայտարարել է, որ ուրախ էր տեսնել, որ տեղամասերում ամեն ինչ կարգին է: Այդպիսով, կարելի է թերևս արձանագրել, որ Ամերիկայի Միացյալ Նահանգները Հայաստանի իշխանությանը՝ Սերժ Սարգսյանին հուշում է, թե ընտրության ինչ որակի դեպքում գոհունակություն կհայտնի դրա արդյունքից: Այսինքն, եթե Սերժ Սարգսյանը կարողանա մայիսի 6-ին խորհրդարանի ընտրությանն ապահովել այնպիսի ընթացք, ինչպես եղել է փետրվարի 12-ին, ապա ԱՄՆ այդ ընտրությունը դրական կգնահատի: Այսինքն, ԱՄՆ համար ներկայումս առավել կարևոր է ոչ թե ընտրության ներքին որակը, այլ արտաքին շերտը՝ թե որքանով է ընտրության արդյունքը ստացվում աղմուկով կամ անաղմուկ:
Դժվար է ասել, թե ինչու է Արևմուտքը բավարարվում դրանով՝ Հայաստանում այս փուլում ավելին համարում է անհնար, թե պարզապես հետապնդում է այլ քաղաքական նպատակներ և կա Հայաստանի իշխանության հետ ընտրական գործընթացի վերաբերյալ պլատֆորմի վրա նոր քաղաքական գործարքների նպատակ: Համենայն դեպս, կարծես թե պարզ է առաջիկա խորհրդարանական ընտրությունների վերաբերյալ արևմտյան ուղենիշը, ինչից իհարկե պետք է հետևություն անեն թե քաղաքական ուժերը, թե հասարակական այլ շերտերը:
Բանն այն է, որ ԱՄՆ դեսպանի գնահատականը ըստ էության կարող է նաև ուղենիշ համարվել այդ շերտերի համար, այն իմաստով, թե որն է լինելու իշխանության գործունեության սահմանն ու ինչ շրջանակում պետք է վերահսկողություն իրականացնել այդ գործունեության հանդեպ:
