Ակցիայի մասնակիցները քիչ առաջ նախագահին ուղղված իրենց նամակը հանձնեցին նախագահի աշխատակազմի ներկայացուցչին: Իրավաբան Արթուր Գրիգորյանին հրավիրեցին՝ պատշաճ կերպով հանձնելու նամակը, որից հետո նա լրագրողներին ասաց՝ հուսով է, որ պատասխանը կլինի շուտ, քանի որ ՇՄԱՓ օրինագիծը նախագահի կողմից պետք է ստորագրվի 21 օրվա ընթացքում:
Հիշեցնենք, որ բնապահպանական քաղաքացիական նախաձեռնությունը պայքարում է փետրվարի 6-ին խորհրդարանում ընդունված ՇՄԱՓ օրինագծի դեմ: Նրանց պնդմամբ՝ օրինագիծը պարունակում է բազմաթիվ բնապահպանական վտանգներ: Ըստ իրավաբան Արթուր Գրիգորյանի՝ ամենակարևոր դրույթն այն է, որ այս օրինագծով չի սահմանափակվում անտառածածկ տարածքների օգտագործումը:
Նամակով բնապահպանները նախագահից պահանջում են չստորագրել ՇՄԱՓ օրինագիծը, ավելին՝ այն ետ կանչել և համապատասխան մշակումներով ներկայացնել խորհրդարան:
Այս պահին ակցիայի մասնակիցները շարժվում են դեպի Մաշտոցի պուրակ՝ շարունակելու իրենց ակցիան ի պաշտպանություն Մաշտոցի պուրակի:
