Ինչպես երեկ հայտնել են իսրայելական լրատվամիջոցները, Ռուսաստանի նախագահ Դմիտրի Մեդվեդևը հունվարին ժամանում է Մերձավոր Արևելք, սակայն նրա պաշտոնական այցն Իսրայել հետաձգվել է: Նա կլինի Ռամալայում, որտեղ կհանդիպի Պաղեստինի ղեկավարության հետ, կայցելի նաև Հորդանանի մայրաքաղաք Ամման:
Հունվարի 4-ին Իսրայելի նախագահ Շիմոն Պերեսը զանգել է ռուսաստանցի իր պաշտոնակցին` ներողություն խնդրելով այցի հետաձգման համար: Հայտնի է դարձել, որ Իսրայելի արտգործնախարարության պաշտոնյաները գործադուլ են հայտարարել, ինչն անհնարին է դարձրել Մեդվեդևի այցի կազմակերպումը: Հեռախոսազրույցի ժամանակ Մեդվեդևը հայտարարել է, որ իր այցի հետաձգումը չի նշանակում մերձավորարևելյան շրջագայության ժամկետների փոփոխում, և ինքն, այնուամենայնիվ, կայցելի Պաղեստին և Հորդանան:
Ռուսական լրատվամիջոցների փոխանցմամբ, ռուս-իսրայելական ֆորումը կկայանա Դավոսում` այս տարվա հունվարի վերջին, տնտեսական համաժողովի ընթացքում: