«Յունիթայմ» ամսագիրը Կապանի քաղաքապետ Արտուր Աթայանին ճանաչել է 2010 թ. «Տարվա մարդ»: Ամսագրի հիմնադիր Նարեկ Սաֆարյանի խոսքով, անցած մեկ տարվա ընթացքում զգալի են Սյունիքի մարզկենտրոնում տեղի ունեցած փոփոխությունները: Կապանի քաղաքապետարանում երեքշաբթի` հունվարի 4-ին, հանդիսավոր պայմաններում խորհրդանշական արձանիկն ու վկայականը հանձնվեց քաղաքապետին: Ի դեպ, «Դե Ֆակտո» ամսագիրը ևս տարվա լավագույն քաղաքապետ է ճանաչել Արտուր Աթայանին: «Յունիթայմ» ամսագրում Կապանի քաղաքապետին շնորհավորել են Սյունիքի մարզպետ Սուրիկ Խաչատրյանը, էներգետիկայի ու բնական պաշարների նախարար, ծնունդով կապանցի Արմեն Մովսիսյանը: ՀՅԴ ԳՄ-ն նույնպես շնորհավորել է քաղաքապետին: Նկատենք, որ Ա. Աթայանը նաև հանրապետության միակ դաշնակցական քաղաքապետն է: Ա. Աթայանի խոսքով, Կապանում անելիքներ շատ կան. խնդիր է աշխատեղերի հարցը, բազմաբնակարան շենքերի մուտքերի նորոգումը, կանաչ գոտիների ավելացումը և այլն: «Յունիթայմ» ամսագիրը «Սյունիք մեդիա» գովազդային գործակալության հիմանդիր Մանաս Կարապետյանին ճանաչել է որպես «Տարվա երիտասարդ գործարար»: Ամսագրի գնահատմամբ, «Տարվա երիտասարդ» է ճանաչվել ԲՀԿ քաղխորհրդի անդամ, ԲՀԿ երիտասարդության հանձնաժողովի նախագահ, ԱԺ պատգամավոր Վահե Էնֆիաջյանը, «Տարվա պաշտոնյա»-ն պետեկամուտների նախագահ Գագիկ Խաչատրյանն է, «Տարվա նախարարը» առողջապահության նախարար Հարություն Քուշկյանը, «Տարվա քաղաքական գործիչը»՝ ԱԺ ՀՅԴ խմբակցության ղեկավար Վահան Հովհաննիսյանը: Նկատենք, որ ամսագրի հիմնադիր, ՀՅԴ անդամ Նարեկ Սաֆարյանը հետաքրքիր բաշխում է արել` տիտղոսներ շնորհելով տարբեր կուսակցության անդամներին: