«Ադրբեջանը պատրաստ է օգտագործել ցանկացած միջոց` տարածքները վերադարձնելու համար»

Ղարաբաղյան հակամարտությունը Ադրբեջանի ամենամեծ խնդիրն է,- կարծում է Ադրբեջանի արտգործնախարար Էլմար Մամեդյարովը. «Մեր տարածքի գրեթե 20 տոկոսը գրավվել է Հայաստանի կողմից, իսկ 1992 թվականին հայկական ուժերը վերացրեցին Խոջալու գյուղի ողջ բնակչությանը: Մենք համառորեն աշխատել ենք, որպեսզի միջազգային հանրությանը տեղեկացնենք այդ մասին և հարցը հասցնենք մինչև ՄԱԿ-ի գլխավոր ասամբլեա»,- նշել է Ադրբեջանի ԱԳ նախարարը մեքսիկական The News-ին տված հարցազրույցում:
Մամեդյարովի խոսքով` երբեմն գոյություն ունեն երկակի չափանիշներ աշխարհաքաղաքական գործընթացներում, և դա անարդարացի է. «Որպեսզի ձեր ձայնը լսելի դառնա` պետք է ուժեղ պետություն լինեք, և հենց այդ պատճառով մենք աշխատում ենք ուժեղացնել միջազգային հանրության դերը հակամարտության կարգավորման գործընթացում մեր դեսպանատների և ԶԼՄ-ների միջոցով»: Ադրբեջանի ԱԳ նախարարի խոսքով` Ադրբեջանի արտգործնախարարության առաջնահերթությունների շարքում է «միջազգային հանրությանը հայկական օկուպացիայի մասին տեղեկացնելը»: «Ցավոք, միջազգային հանրությունը, մասնավորապես ԱՄՆ-ը, Ռուսաստանը և Ֆրանսիան, որոնք խաղաղ կարգավորման գործընթացի և հայկական զորքերի դուրս բերման հարցով միջնորդներ են, Հայաստանի նկատմամբ անհրաժեշտ ճնշումներ չեն գործադրում: Այդպիսով, մենք պետք է ակտիվացնենք մեր բանակցությունները»:
Ադրբեջանի ԱԳ նախարարը նշել է, որ արդեն գոյություն ունի սկզբունքների պլան ուղիղ բանակցությունների համար, և այդ բանակցություններից հետո, ըստ Ադրբեջանի ԱԳ նախարարի, Ադրբեջանը հայտարարել է, որ պատրաստ է սկսել աշխատանքը խաղաղ համաձայնագրի շուրջ: Մամեդյարովն այնուհետև նշել է, որ Սերժ Սարգսյանը ապակառուցողական դիրքորոշում է որդեգրել. «Ի վերջո, դա ժամանակի հարց է, իհարկե, ես վստահ եմ, որ Հայաստանը կվերադարձնի մեր տարածքները, քանի որ դա միջազգային իրավունքի հարց է: Միջազգային բոլոր պայմանագրերի, այդ թվում՝ և ՄԱԿ-ի կանոնադրության տեսանկյունից արդարությունը մեր կողմն է»,- ասել է նա: Ադրբեջանի ԱԳ նախարարը նշել է, թե իրենք ձգտում են ապացուցել, որ ժամանակը Հայաստանի օգտին չի աշխատում, և ընդգծել է, որ դիվանագիտական ջանքերը սպառվել են. «Եթե դիվանագիտական մեթոդները արդյունք չտան, ապա, այո, մենք պատրաստ ենք ցանկացած միջոցների, որպեսզի վերադարձնենք մեր տարածքները»: