Հունվարի 18-ին, ԵԽԽՎ հունվարյան նստաշրջանից առաջ, սպասվում է Եվրոպայի խորհրդի Մարդու իրավունքների գլխավոր հանձնակատար Թոմաս Համմարբերգի այցը Հայաստան: Հայտնի է, որ Թոմաս Համմարբերգը եվրոպացի այն պաշտոնյաներից է, որն աչքի է ընկել Հայաստանի իշխանությունների նկատմամբ կոշտ դիրքորոշմամբ և առաջինն էր, որ 2008 թվականի մարտի 1-ի ողբերգական դեպքերից հետո ՀՀ առաջին նախագահ Լևոն Տեր-Պետրոսյանի կալանավորված կողմնակիցներին անվանեց «քաղաքական հայացքների համար կալանավորված անձինք»: Թոմաս Համմարբերգը նաև եվրոպացի այն պաշտոնյան է, որը մարտիմեկյան դեպքերից ամիսներ անց, այցելելով Հայաստան, ՀՀ իշխանություններից պահանջել էր կամ քաղաքական հայացքների համար կալանավորված անձանց գործերն ուղարկել դատարան, եթե ունեն ապացույցներ, կամ ազատ արձակել նրանց: «Առաջին լրատվական»-ը իրավապաշտպան, Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցից հետաքրքրվեց, թե Համմարբերգի այցը կարո՞ղ է ազդել ՀՀ իշխանությունների վարքագծի վրա, և նրանք ստիպված լինեն ԵԽԽՎ հունվարյան նստաշրջանից առաջ ազատ արձակել քաղբանտարկյալներին: Արթուր Սաքունցը մեր զրույցի ժամանակ նշեց, որ ինքը, որպես իրավապաշտպան, չի ակնկալում, որ իշխանությունները կփոխեն իրենց վարքագիծը և որևէ քաղբանտարկյալի ազատ կարձակեն: «Եթե եվրոպական կառույցների ճնշումը դեր խաղար, ապա ոչ մի քաղբանտարկյալ այսօր անազատության մեջ չէր գտնվի»,- ասաց նա: Նա հիշեցրեց, թե ինչպես են իշխանությունները շարունակում ապօրինաբար անազատության մեջ պահել ազատամարտիկ Սասուն Միքայելյանին, որի սիրտը վերջերս վիրահատեցին, և որը առողջական լուրջ խնդիրներ ունի: «Նիկոլ Փաշինյանին մեկուսացրեցին` նրա կապը կտրելով արտաքին աշխարհի հետ, որպեսզի չկարողանա հանդես գալ հրապարակումներով»,- ասաց իրավապաշտպանը: Արթուր Սաքունցը տեղեկացրեց, որ Թոմաս Համմարբերգը ցանկություն է հայտնել հանդիպելու հայաստանյան իրավապաշտպանների հետ, և հանդիպման ժամանակ ինքն անպայման արծարծելու է քաղբանտարկյալների հարցը: Նա կարծիք հայտնեց, որ Թոմաս Համմարբերգն իր`Հայաստան կատարած այցի ընթացքում կհանդիպի քաղբանտարկյալ, «Հայկական ժամանակ» օրաթերթի գլխավոր խմբագիր Նիկոլ Փաշինյանի հետ: Իրավապաշտպանն ակնկալում է, որ գուցե Համմարբերգի այցից հետո փոխվեն Նիկոլ Փաշինյանի պահման պայմանները: Արթուր Սաքունցը հիշեցնում է, որ ՀՀ իշխանությունները անուշադրության են մատնել ԵԽԽՎ-ի նախորդ բանաձևերը, և այդ փաստը չի վրիպել ԵԽԽՎ մոնիտորինգի հանձնաժողովի աչքից: Նա ասաց, որ ԵԽԽՎ համազեկուցողներն առաջիկայում անպայման պետք է անդրադառնան դրան:
