Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում այսօր շարունակվեց դերասանուհի Անժելա Սարգսյանի անձնական կյանքին վերաբերող տեղեկությունները, այդ թվում՝ լուսանկարներ և տեսանյութեր, համացանցում տարածած Կարեն Արայանի դատավարությունը:
Այսօրվա դատական նիստում ցուցմունք է տվել Անժելա Սարգսյանը, և ինչպես «Առաջին լրատվականի» հետ զրույցում նշեց Կարեն Արայանի պաշտպան Արթուր Ղարիբյանը, դերասանուհին պնդել է մեղադրանքը: Ամբաստանյալի պաշտպանը հրաժարվեց այլ մանրամասներ հաղորդել, սակայն նշեց, որ հաջորդ նիստին հարցաքննվելու են վկաները, որոնց թիվը հասնում է 17-ի:
Հիշեցնենք, որ դատավոր Մխիթար Պապոյանի որոշմամբ` նիստն ընթանում է դռնփակ կարգով, քանի որ վերաբերում էր մարդու անձնական կյանքին: Նախորդ դատական նիստի ժամանակ ցուցմունք էր տվել ամբաստանյալը, իսկ նրա պաշտպանի միջնորդությունը` Կարեն Արայանին գրավով ազատ արձակելու վերաբերյալ, դատարանը մերժել էր: Դատավորը սա պայմանավորել էր այն հանգամանքով, որ դատաքննության ընթացքում պետք է լսվեն կարևոր վկաներ, իսկ դրսում լինելով՝ Կարեն Արայանը կարող է ճնշում գործադրել նրանց վրա:
Նշենք, որ 2011 թվականի հոկտեմբերի 5-ին Կարեն Արայանը ձերբակալվել էր, նրան մեղադրանք է առաջադրվել ՀՀ Քրեական օրենսգրքի 144 (Անձնական կամ ընտանեկան կյանքի մասին տեղեկություններ ապօրինի հավաքելը, պահելը, օգտագործելը կամ տարածելը) և 263 (պոռնոգրաֆիկ նյութեր կամ առարկաներ ապօրինի տարածելը) հոդվածների հատկանիշներով: Հոկտեմբերի 7-ին Երևանի Կենտրոն-Նորք Մարաշ ընդհանուր իրավասության դատարանը նրա նկատմամբ խափանման միջոց էր ընտրել երկամսյա կալանքը, իսկ դեկտեմբերի 5-ին երկու ամսով երկարացվել էր կալանքի որոշումը:
Այս գործով հաջորդ դատական նիստը տեղի կունենա մարտի 5-ին՝ 14: 00-ին: