Արդեն երրորդ օրն է` Մաշտոցի պուրակում շարունակվում է այգու պահպանությանն ուղղված ակցիան: Ակցիայի մասնակիցների ջանքերով դադարեցվել են շինարարական գործողությունները: Այսօր պուրակում ցուցադրվում են Հայկ Բիանջյանի լուսանկարները, որտեղ հիմնականում պատկերված են Երևանի քանդվող շինությունները:
Լուսանկարչի խոսքով՝ ինքը, լսելով ակցիայի մասին, փորձել է ինչ-որ կերպ օգնել, թույլ չտալ, որ այգու մասին էլ հիշեն միայն նկարներով. «Քանի որ երիտասարդները պայքարում են այգու պահպանման համար, մտածեցի, որ կարելի էր, բացի կանաչ տարածքներից, ցուցադրել նաև այն, ինչը ոչնչանում է մեր քաղաքում: Հիշեցի իմ ֆոտոարխիվի մասին: Փորձը ցույց է տալիս, որ Երևանը պահպանում ենք միայն լուսանկարների մեջ»:
Նկարները ցուցադրվում են բացօթյա՝ ակցիայի մասնակիցների փոքրիկ տաղավարում:
«Առաջին լրատվական»-ի հետ զրույցում ակցիայի մասնակիցները նշեցին, որ վաղը կհանդիպեն քաղաքապետի հետ և կքննարկեն այգուն վերաբերող հարցերը: Իսկ այն հարցին, թե ինչքան կշարունակվի ակցիան, պատասխանեցին` այնքան, ինչքան պետք լինի այգին հանրությանը վերադարձնելու համար: