Հայ եկեղեցին Քրիստոսի ծնունդը նշում է հունվարի 6-ին: Արդեն հունվարի 5-ի երեկոյան սկսվում է ճրագալույցի պատարագը, որից հետո հաջորդ օրը` հունվարի 6-ին, նշվում է Քրիստոսի ծնունդը: Երևանի Կաթողիկե Սուրբ Աստվածածին եկեղեցու հոգևոր հովիվ տեր Ավետիս քահանա Դանիելյանի խոսքերով, սա սովորական պատարագ է, պարզապես Քրիստոսի ծննդյան օրը նաև մկրտության խորհուրդն է կատարում` ի տարբերություն կաթոլիկ և ուղղափառ եկեղեցիների, որոնք ավելի ուշ` մի քանի օր հետո են կատարում Քրիստոսի մկրտությունը: Օրհնված ջուրը բաժանվում է ժողովրդին, որը, ըստ Տեր Ավետիս քահանայի, օգտագործում են բժշկության, օրհնության համար: «Սուրբ ծննդյան տոներից հետո մենք կատարում ենք նաև (քանի որ սա մեծ տոն է) հոգեհանգստյան կարգ` հիշատակ ննջեցելոց, այնպես որ, մենք խորհուրդ կտանք մեր քրիստոնյա հայ եկեղեցու զավակներին եկեղեցի գալ հունվարի հինգի երեկոյան` մասնակցելու սուրբ պատարագին»,- նշում է քահանան: Հունվարի 6-ին` առավոտյան ժամը 11-ին, մատուցվում է պատարագ, իսկ արդեն հունվարի 7-ին կարող են գնալ գերեզմաններ: Քահանայի խոսքերով` սխալ, թյուր կարծիք կա հին և նոր ննջեցյալների համար տարբեր օրերի գերեզման այցելելու, բայց չի կարելի, բոլոր ննջեցյալներին պետք է այցելել հունվարի 7-ին:
Կարծիք կա, որ այս տոնը մեզանում այնքան էլ լավ չի տոնվում, Տեր Ավետիս քահանան համակարծիք չէ: Ըստ նրա`եթե համեմատենք 30 տարի առաջ և հիմա, մենք բավականին առաջ ենք գնացել, ժողովուրդն ավելի հաճախ է գալիս եկեղեցի, դեկտեմբերի 30-ից մինչև հունվարի 5-ը պահոց շրջան է: «Շատ զարմանալի է, որ այդքան մսեղեն են օգտագործում, բայց տարեցտարի նկատում եմ, որ երիտասարդները, ավելի հավատավոր մարդիկ պաս են պահում այդ օրերին, այսինքն` անցկացնում են այնպես, ինչպես կանոն է պահանջում. Իհարկե, չենք կարող ասել, թե Սուրբ Հարության մեծ պասի չափ մարդիկ պաս են պահում, բայց տարեցտարի ականատես եմ լինում, լսում եմ, որ պաս են պահում նաև այս օրերին»,-նկատում է քահանան` ավելացնելով, որ կաթոլիկ ռուս եկեղեցում ավելի երկար ծեսեր են կատարում, օրինակ` ռուս եկեղեցին խաչի թափորներ է անում և այլն: Այնուամենայնիվ, տեր Ավետիսը նշում է, որ թեև դանդաղ, բայց առաջ ենք գնում:
