«Հայելի» ակումբի այսօրվա հյուրերն էին ՀՀԿ-ական պատգամավոր Կարեն Ավագյանը և «Ժառանգություն» խմբակցության պատգամավոր Ստեփան Սաֆարյանը:
Լրագրողների հարցին՝ ի՞նչ տվեց հայաստանյան երեք կուսակցությունների՝ ԵԺԿ-ին անդամակցությունը , Ս. Սաֆարյանը պատասխանեց.
«Մենք չէ, որ պետք է որոշեինք, թե էլ ովքեր են գնում այդ կառույցին անդամակցելու: Մեզ համար, իհարկե, հաճելի էր լսել, որ Հայաստանի երեք կուսակցություններ անդամակցեցին, բայց երբ նույն օրը դիտում ես, թե ինչպես են ԱԺ նիստերի դահլիճում ուրիշի փոխարեն քվեարկում, արդեն անհասկանալի է»:
Կ. Ավագյանը նկատեց, որ նմանատիպ խնդիրներ կան բոլոր խորհրդարաններում, և հավելեց. «Րաֆֆի Հովհաննիսյանը քաղաքական ծաղրածուի դեր է ստանձնել՝ բե՞ղ թողնել, թե՞ ոչ…»:
Ս. Սաֆարյանը հակադարձեց. «Հերմինե Նաղդալյանին լրագրողները հարց են ուղղում, ասում է՝ ե՞ս, ես չեմ քվեարկել ուրիշի փոխարեն, Արա Բաբլոյանը ասում է՝ ինձ բժշկությունից հարց տվեք. սա է կրկեսը, դուք եք քաղաքականությունը դարձրել ծաղրուծանակի առարկա»:
Անդրադառնալով հարցին՝ ինչպե՞ս են քաղաքական ուժերը պատրաստվում ընտրություններին, Ս. Սաֆարյանը նկատեց. «ՀՀ իշխանությունները չեն ապահովում ազատ մրցակցային ընտրություններ, դա արդեն փաստ է, թեև ունենք կիլոմետրերով նմանօրինակ հայտարարություններ ու ելույթներ:
Որևէ միջազգային ինստիտուտ և կառույց ի զորու չէ պարտադրել ազատ ընտրություններ, միակ պարտադրողը պետք է լինի ժողովուրդը: Ընդդիմության նպատակը պետք է լինի իշխանությունների նկատմամբ ժողովրդի ճնշումը ապահովել, որպեսզի կեղծիքներ չլինեն: Իսկ եթե իշխանություններին թվում է, թե 2008թ. Մարտի 1-ը մարսելու են, ապա այդպես չէ»:
Կարեն Ավագյանը հակադարձեց. «Հիմա եկեք Մարտի 1-ից չխոսենք: Եկեք չպիտակավորենք… Այժմ բոլոր պայմանները ստեղծվել են՝ անցկացնելու ազատ ընտրություններ»:
Ի պատասխան՝ լրագրողներն ասացին. Մարտի 1-ն էլ կատարվեց ընտրությունների արդյունքում, և ի՞նչ երաշխիք, որ իշխանությունը չի գնա նման քայլի: