Ժողովուրդը կորոշի` պե՞տք է ՀՀԿ-ն բեռնաթափի իր վրա եղած պատասխանատվությունը, թե՞ ոչ: Այսօր կայացած քննարկմանն այս մասին ասաց ԱԺ ՀՀԿ խմբակցության ղեկավար Գալուստ Սահակյանը:
«Նպատակների տերն ու տնօրենը ժողովուրդն է: Բեռնաթափման որոշում կայացնել-չկայացնելը կախված է լինելու ժողովրդի հրամայականից: Կոնկրետ ՀՀԿ-ի համար ամենակարևորը լավ ընտրություններ ունենալն է և լավ ընտրությունների մասնակից լինելը:
Եթե քաղաքական ուժերը ակտիվ, բանիմաց մարդկանց ներառեն ընտրատեղամասերում տարվող աշխատանքներում, եթե ընտրությունների ժամանակ մեծ թվով եվրոպացի դիտորդներ հրավիրվեն, մենք միայն դրա կողմնակիցը կլինենք: Իսկ ընդհանրապես, բարձրացել է Հայաստանի և հայ ժողովրդի ճանաչելիությունը ամբողջ աշխարհում, և որքան դրական գնահատական ստանան ընտրությունները, մեր քաղաքական օրակարգն ավելի շարժուն կլինի` թե ԼՂ հարցում, թե Ցեղասպանության միջազգային ճանաչման և թե մնացած բոլոր հարցերում:
Այս ընտրություններին խնդիր է դրված պահպանել արդյունքները: Ընտրությունները զանգվածային միջոցառումներ են, և անհրաժեշտ է, որ յուրաքանչյուր քաղաքական ուժ հակադարձումների մեխանիզմ չօգտագործի, այլ ավելի շատ շփվի ընտրողների հետ և ներկայացնի իր ընտրական ծրագիրը:
Օրինակ՝ ՀՀԿ-ն նախընտրական ծրագիր կազմելուց առաջ հանդիպումներ է ունենալու ՀՀ քաղաքացիների հետ, որպեսզի հասկանա` որոնք են մարդկանց հուզող առաջնային խնդիրները և հենց դրանք ներառի իր ծրագրերում»,- ասաց ՀՀԿ պատգամավորը:
Անդրադառնալով երեկ` փետրվարի 12-ին կայացած ՏԻՄ ընտրություններին` Գալուստ Սահակյանը նշեց՝ եթե այս պահի դրությամբ դրանց ընթացքի ու արդյունքների վերաբերյալ ոչ մի բողոք չկա, նշանակում է՝ քաղաքական բոլոր ուժերը համաձայն են արդյունքներին: «Իրենք՝ կուսակցությունները, չպետք է աղճատեն ընտրությունների արդյունքները»,- ասաց նա: