Կոալիցիոն նոր հուշագրի շուրջ քննարկումներ չեն ծավալվում, բայց եթե անգամ դրա շուրջ խոսակցություններ կան, ապա միայն տեխնիկական բնույթի: Այսօր կայացած քննարկմանն ասաց ԱԺ ՀՀԿ խմբակցության ղեկավար Գալուստ Սահակյանը:
«Մենք առաջ ենք շարժվում անցած տարի փետրվարի 17-ին կնքված կոալիցիոն հուշագրով: Մենք նոր հուշագրի անհրաժեշտություն չենք տեսնում: Խնդիրն այս պարագայում կուսակցությունների հավատամքն է»,- ասաց նա:
Անդրադառնալով Հրազդանում երեկ կայացած քաղաքապետի ընտրություններին` Սահակյանը նշեց, որ եթե դուրս գանք ասեկոսեների մակարդակից, ապա դրանք բավական լավ ընտրություններ էին: «Թեպետ պարտվող կողմը պարտությունը ցավոտ է տանում, բայց որևէ խոսակցություն, դժգոհություն գոնե ես չեմ լսել»,- նշեց Գալուստ Սահակյանը:
Պատասխանելով հարցին` ո՞վ կարող է տեղ գրավել ՀՀԿ համամասնական ցուցակում, Սահակյանը նշեց, որ հարցը չի կարելի շահարկման առարկա դարձնել: «Մեր ցուցակն անձնավորված չէ: Ոչ Գագիկ Բեգլարյանի, ոչ Գալուստ Սահակյանի` ցուցակում ընդգրկվելու մասին խոսք չի եղել, չնայած Գագիկ Բեգլարյանը ՀՀԿ գործադիր մարմնի անդամ է»: