«Մենք ենք այս քաղաքի տերը», «Մեր քաղաքը» նախաձեռնության անդամները արդեն երրորդ օր է՝ չեն լքում Գլխավոր պողոտայի՝ Մաշտոցի պողոտային հարող այգին: Այս մասին «Առաջին լրատվական»-ին տեղեկացրեց «Մենք ենք այս քաղաքի տերը» քաղաքացիական նախաձեռնության անդամ Գայանե Մելքոմյանը` խոսելով Աբովյան փողոցի էլիտար կրպակները Մաշտոցի այգի տեղափոխելու շուրջը առաջացած բողոքի մեծ ալիքի մասին:
Նա տեղեկացրեց, որ չեն ցանկանում՝ հիմա էլ Մաշտոցի այգում տեղադրվեն կրպակներ: Այս մտահոգությամբ քաղաքացիական նախաձեռնության անդամները դիմել են քաղաքապետարան, սակայն որևէ պատասխան չեն ստացել: «Շաբաթ օրը այգում մեծ ակցիա կազմակերպեցինք, իսկ նստացույցն ինքնաբուխ սկսվեց: Մեզ այդ օրը հաջողվեց կասեցնել կրպակների շինարարությունը, մնացինք այնտեղ, որպեսզի մեր գնալուց հետո չշարունակվի շինարարությունը, մինչ հարցին կարողանանք իրավական և վերջնական լուծում տալ»,- եզրափակեց Գայանե Մելքոմյանը:
Հիշեցնենք, որ նախորդ քաղաքապետ Կարեն Կարապետյանի որոշմամբ՝ սկսվեց կրպակների ապամոնտաժման ծրագիրը, սակայն գործող քաղաքապետ Տարոն Մարգարյանի նախաձեռնությամբ՝ ապամոնտաժվեցին դեռ միայն Աբովյան փողոցի էլիտար կրպակները: Դրանք երկու շաբաթ առաջ սկսեցին տեղադրել Մաշտոցի այգում:
