Հարավային Սուդանում արդեն մեկ շաբաթից կարող է ստեղծվել նոր պետություն: Այս մասին որոշում կարելի կլինի կայացնել այն դեպքում, եթե հաջորդ շաբաթ կայանալիք հանրաքվեի ժամանակ շրջանի բնակչության մեծամասնությունը կողմ արտահայտվի անկախության առաջարկին: Հանրաքվեին մասնակցելու համար գրանցվել է այս շրջանի բնակչության 95%-ը: Այս մասին հաղորդում է BBC-ն:
Այս շրջանը հիմնականում բնակեցված է քրիստոնյաներով կամ հեթանոսներով, որի հետևանքով լուրջ խնդիրներ են առաջացել այստեղի բնակչության և Սուդանի կենտրոնական իշխանությունների միջև: 1972 թ. Եթովպիայի մայրաքաղաք Ադիս Աբեբայում ստորագրվել էր համաձայնագիր, որի արդյունքում այդ շրջանում համեմատաբար հանգիստ իրավիճակ էր ստեղծվել: Հարաբերական անդորրը տևեց տասը տարի, սակայն երբ 1983 թ. կառավարությունը քրիստոնյա-հեթանոսական շրջանում մտցրեց շարիաթի հենքի վրա գործող դատական համակարգ, ծագեց հակամարտություն կենտրոնական իշխանությունների և տեղի բնակչության միջև:
Ռազմական գործողությունները տարբեր հաճախականությամբ տևել են մինչև 2005 թ., երբ Քենիայում ստորագրվեց նոր համաձայնագիր, որի համաձայն, Հարավային Սուդանը ստացել է լայն ինքնավարություն: Այդ ժամանակ էլ հայտարարվել է անկախության հանրաքվե անցկացնելու մտադրության մասին:
Հարավային շրջանի անկախացման դեմ արտահայտվել է Լիբիայի նախագահ Մուամմար Քադաֆին, որը մտահոգություն է հայտնել այս կապակցությամբ` ասելով, թե այդ շրջանի անկախացումը անջատողական շարժումներ առաջ կբերի աֆրիկյան որոշ երկրներում: