Այսօր գյուղապետի ընտրություններ էին Շիրակի մարզի ամենամեծ համայնքներից մեկում` Պեմզաշենում, որտեղ պաշտոնակռիվ էին տալիս նախկին ու ներկա գյուղապետերը` ՀՀԿ-ական Երվանդ Միքայելյանն ու գեներալ Մանվելի սանիկը` ԵԿՄ-ական Անան Ոսկանյանը:
Aravot.am-ին հայտնի է դարձել, որ գյուղապետ է վերընտրվել գեներալի սանիկը, ով , ըստ ականատեսների, գյուղում այնպիսի մի հրավառություն ու խնջույք է կազմակերպել, որ շատերին թվացել է, թե Արևմտյան Հայաստանն են Թուրքիայից ազատագրել: Նախնական տեղեկություններով, Անան Ոսկանյանը 1300 ձայն է հավաքել, իսկ մրցակիցը` 300:
Կայքի ԵԿՄ-ական աղբյուրները փոխանցել են, որ նախկին գյուղապետ, նորաթուխ հանրապետական Երվանդ Միքայելյանին Անան Ոսկանյանի դեմ դուրս էին հանել Վարագյան եղբայրները: Նշենք, որ Վարագյան եղբայրներից մեկը` ՀՀԿ-ական Խաչատուրը, Արթիկի քաղաքապետն է, Մխիթար Վարագյանն էլ այդ տարածաշրջանից ընտրված ՀՀԿ-ական պատգամավոր է:
Ըստ aravot.am-ին հասած տեղեկությունների, Պեմզաշենի պես մեծ համայնքում ՀՀԿ-ական գյուղապետ ունենալը հատկապես ձեռնտու է եղել պատգամավոր Վարագյանին, ով նորից ցանկությունի ունի ԱԺ մտնելու, հաշվարկ է կատարել ու հասկացել, որ Երվանդ Միքայելյանի գյուղապետ դառնալը իրեն ձայն բերելու առումով շատ հարմարավետ է: ԵԿՄ-ականների պարծենալով, Մխիթար Վարագյանը ուղղակիորեն սխալվել է, չի մտածել, որ իրենք աթոռ զիջողներից չեն:Պատահական չէ, որ ժամեր առաջ, դեռ ընտրությունները չվերջացած, գեներալի սանիկը մեզ հայտնեց, որ ինքը արդեն հաղթել է, և գյուղապետ է լինելու մինչև 2030 թվականը, այսինքն նա էլ մյուսների պես, որոշել է այս աթոռը սեփականաշնորհել:
Լուսանկարը՝ Aravot.am-ի