Վերջերս կատարված հետազոտությունից պարզվել է, որ լավ ընկեր ունենալը երեխաներին օգնում է հեշտորեն լուծել բացասական խնդիրները:
Հետազոտությունն իրականացրել են Մոնրեալի Կոնկորդիա համալսարանի հետազոտական կենտրոնի գիտնականները: Health Day-ի փոխանցմամբ՝ գիտնականները պարզել են, որ տհաճ իրադրություններում լավագույն ընկեր ունենալը օգնում է երեխային և նրա վրա ունենում բարերար ազդեցություն:
Գիտնականները նկատել են, որ երբ երեխան դժվարին պահերին միայնակ է մնում, նրա մոտ նվազում է ինքնագնահատումը:
Հետազոտությունն իրականացնելիս գիտնականները 5-րդ և 6-րդ դասարանների 55 տղաների և 48 աղջիկների խնդրել են 4 տարի շարունակ օրագրերում գրառումներ կատարել իրենց զգացմունքների մասին: Երեխաների մոտ կորտիզոլի մակարդակը նույնպես պարբերաբար ստուգվել է: Նշենք, որ կորտիզոլը սթրեսի հորմոն է:
Հետազոտությունը, որը վերջերս հրապարակվել է Developmental Psychology ամսագրում, բացահայտել է, որ կորտիզոլի մակարդակը բարձրանում է, և ինքնագնահատումը իջնում է, երբ երեխան բարդ իրավիճակներում միայնակ է լինում: Լավ ընկերոջ ներկայության դեպքում կորտիզոլի մակարդակը ավելի ցածր է լինում:
Ըստ գիտնականների՝ այն, ինչ կատարվում է երեխայի հետ նրա մանկության տարիներին, մեծ ազդեցություն է թողնում դեռահասության շրջանի վրա: