Ամերիկյան Time ամենշաբաթյա ամսագիրը իր կայքում հրապարակել է Ուիթնի Հյուսթոնի ամենահայտնի երգերը: TOP-10-ը գլխավորում է «Թիկնապահը» ֆիլմի հիթ դարձած` I Will Always Love You հայտնի երգը:
TOP-10-ի մեջ են նաև Waiting to Exhale ֆիլմից Exhale (Shoop Shoop) հիթը, ինչպես նաև սինգլներ, որոնք երգչուհուն աշխարհահռչակ դարձրին. ռոմանտիկ բալլադ`Saving All My Love For You, պարային` How Will I Know, ինչը երգչուհուն ներկայացրեց MTV-ի լսարանի առջև, և Greatest Love of All-ը:
Հիշեցնենք, որ Saving All My Love For You երգի համար «Լավագույն փոփ-կատարող» անվանակարգում Հյուսթոնը ստացել է իր առաջին Grammy մրցանակը, ինչպես նաև պարգևներ Emmy, American Music Awards և MTV Video Music Awards մրցանակաբաշխություններում:
Հյուսթոնի երկրորդ ալբոմից (1987 թվական) I Wanna Dance With Somebody (Who loves me) և Didn’t We Almost Have It All-ը առաջին տեղերն էին գրավել Billboard Hot 100-ում: Այս ալբոմի 7 իրար հաջորդող երգերը Hot 100-ում դարձել էին թիվ մեկ հիթերը` ետևում թողնելով Բիթլզի և Bee Gees-ի ռեկորդները:
Ուիթնին Ամերիկայում 9 անգամ ստացել է պլատինե սերտիֆիկատ: I wanna dance with somebody երգի համար Հյուսթոնը ստացել է իր երկրորդ Grammy-ն:
I’m Your Baby Tonight երգը երրորդ ալբոմի անվանումն էր, որը թողարկվեց 1990 թվականին: Ալբոմը երրորդ տեղը գրավեց Billboard 200-ում և ԱՄՆ-ում ստացավ քառակի պլատինե սետիֆիկատ: Ամբողջ աշխարհում վաճառվել էր ավելի քան 10 միլիոն օրինակ: Չնայած այս ալբոմը կոմերցիոն տեսակետից զիջում էր նախկին երկու ալբոմներին, սակայն այն արժանացավ քննադատների գովասանքին: Ռոլինգ Սթոնը այն անվանել է Հյուսթոնի լավագույն ալբոմը:
Հիշեցնենք, որ աշխարհահռչակ երգչուհին մահացել է շաբաթ օրը, 48 տարեկանում, Beverly Hilton հյուրանոցի իր համարում: Մահվան պատճառը դեռևս անհայտ է. ոստիկանները բացառում են սպանության վարկածը:
Ինչպես հաղորդում է newsru.com-ը, Ուիթնի Հյուսթոնին անգիտակից վիճակում գտել է նրա թիկնապահը: Շտապօգնության բժիշկների` նրան փրկելու փորձերը ապարդյուն են եղել:
