Արմավիրի մարզի Արշալույս և Ալաշկերտ գյուղերում այսօր տեղի են ունեցել համայնքապետի ընտրություններ: Արշալույսի համայնքապետի թեկնածուները երկուսն են՝ գործող համայնքապետ, ՀՀԿ անդամ Զարզանդ Գրիգորյանը և նախկին համայնքապետ, դարձյալ ՀՀԿ անդամ Գրիգոր Գրիգորյանը: Արշալույս համայնքում երկու ընտրատեղամաս կա:
Մեր ունեցած տվյալներով՝ այս պահի դրությամբ ձայների առավելությամբ առջևում է Զարզանդ Գրիգորյանը, որը Երկրապահ կամավորականների միության նախագահ գեներալ Մանվել Գրիգորյանի եղբորորդին է, սակայն չի վայելում վերջինիս աջակցությունը:
Ընտրություններին լուրջ միջադեպեր չեն գրանցվել: Ընդհանուր առմամբ ցուցակների անճշտություն է եղել կապված 10 անձանց հետ: Այդ անճշտությունը դատարանի միջոցով ուղղվել է: Դիտորդները բողոքներ չեն ներկայացրել:
Ըստ նախնական տվյալների՝ Ալաշկերտ գյուղում համայնքապետ է ընտրվել ՀՀԿ-ական թեկնածու Կարեն Հովհաննիսյանը: Մեր ունեցած տվյալներով՝ Հովհաննիսյանի ձայները 650-ով ավելի են մրցակցի ձայներից:
