Սուրբ Սարգիսը համարվում է երիտասարդ, սիրող զույգերի հովանավոր անձ, ու այս տոնը մեզանում հաճախ ասոցացվել է գուշակությունների հետ։ Ժողովուրդը հավատում է, որ սպիտակ ձիու վրա նստած Սուրբ Սարգիսը գալիս է ու ձիու պայտը դրոշմում տանիքում դրված փոխինդի վրա։ Եթե առավոտյան դրոշմ լինում էր, ապա այդ տարին հաջողություն էր բերելու ընտանիքի երիտասարդներին։ «Առաջին լրատվական»-ի հետ զրույցում նման կարծիք հայտնեց ազգագրագետ Սոնա Պապիկյանը՝ անդրադառնալով Սբ. Սարգսի տոնին։
Նրա խոսքով՝ այդ օրը կատարվել են բախտագուշակություններ, փոխինդ են եփել, կերել, օրինակ՝ Շիրակի մարզում փոխինդը ծառի վրա են դրել, ու որ կողմից թռչունը մոտեցել է այդ պատառին, ուրեմն այդ կողմից է գալու երիտասարդը կամ աղջիկը։ «Սուրբ Սարգիսը սիրո, ամուսնությունների հետ կապված օր է»,- նկատեց Ս. Պապիկյանը։
Ինչ վերաբերում է ամբողջ աշխարհում նշվող Վալենտինի օրվան, ապա նա նշեց, որ տոնը բացարձակ կապ չունի հայերիս հետ։ «Մեր կողմից էլ բացարձակ իմաստ չունի այն նշելը, քանի որ այն հայկական չէ, թեև Սբ. Սարգիսը, հայկական չլինելով, ընդունվել է մեր կողմից ու այն տոնվում է»,- նշեց ազգագրագետը՝ հայտնելով, որ Սբ. Սարգսի տոնը նշելու օրը համարվում է նաև Սարգիս անունով երիտասարդների անվանակոչության օր ու ունի հայկական երանգներ՝ ի տարբերություն Վալենտինի։
«Պետք չէ այդքան գովազդել Վալենտինի օրը, թեև այդ սիրո տոնի բացիկները գեղեցիկ են, սակայն տոնը մերը չէ»,- խոսքը եզրափակեց նա։
