Associated Press-ի տվյալներով, հունվարի 1-ին տեղի են ունեցել Microsoft ընկերության Hotmail փոստային ծառայության աշխատանքի խափանումներ: 2011 թ. առաջին օրը Microsoft-ի ֆորումում հայտնվեցին Hotmail-ի օգտատերերի հայտարարությունները, որտեղ նրանք իրենց բողոքն էին արտահայտում փոստային արկղից բոլոր ընթերցված, պահպանված և այլ տեսակի հաղորդագրությունների անհետացման վերաբերյալ:
Որոշ օգտատերեր հայտարարել են նաև, որ առանց իրենց թույլտվության ընթերցված նամակները «մուտքային» բաժնից տեղափոխվել են «հեռացված» բաժին: Նման բողոքների թիվը մի քանի ժամում հասել է ավելի քան 500 էջի:
Windows Live տեխսպասարկման ընկերությունը բողոքին ի պատասխան նույն ֆորումում հայտարարություն է տարածել, որ Hotmail-ի աշխատակիցները տեղյակ են խափանումների մասին և աշխատում են շտկել դրանք: Իր հերթին Microsoft-ի պաշտոնական ներկայացուցիչ Քեթրին Բրուքերը շաբաթ օրն ընդունել է փոստային ծառայության խափանման հանգամանքը, սակայն ընդգծել է, որ դրա հետ առնչվել են շատ քիչ թվով օգտատերեր: Այլ մեկնաբանություններից Բրուքերը ձեռնպահ է մնացել:
Ինչպես հիշեցնում է Associated Press գործակալությունը, 2010 թ. վերջի տվյալներով, Hotmail-ն ունի 360 մլն օգտատեր, որով նա գլխավորում է աշխարհի ամենահայտնի փոստային ծառայությունների ցանկը:
«Առաջին լրատվական»-ին հաջողվել է պարզել, որ հայաստանցի օգտատերերը նույնպես ունեցել են խնդիրներ:
