ԵՊՀ իրանագիտության ամբիոնի դասախոս, ԱՐՄԱԿԱԴ գիտական ցանցի հիմնադիր Խաչիկ Գևորգյանը դեռևս վերջնական որոշում չի կայացրել՝ առաջադրվելո՞ւ է արդյոք մեծամասնական ընտրակարգով Երևանի Կենտրոն վարչական շրջանի թիվ 9 կամ թիվ 10 ընտրատարածքներում: Այս մասին նա ասաց «Առաջին լրատվական»-ի հետ զրույցում՝ միաժամանակ հավելելով, որ ավելի շատ հակված է առաջադրվելու, քան չառաջադրվելու մտքին: «Ուղղակի պետք է որոշեմ: Վերջնական որոշում կկայացնեմ հավանաբար մոտակա մեկ ամսում»,- տեղեկացրեց Խաչիկ Գևորգյանը:
Հարցին՝ ինչպիսի՞ ընտրապայքար է ակնկալում գործարար Գարիկ Նուշիկյանի հետ մրցակցության պայմաններում, ով ևս Կենտրոն վարչական շրջանից մեծամասնականով առաջադրվելու մտադրություն ունի (հիշեցնենք՝ վերջինս ՀՀ գլխավոր դատախազ Աղվան Հովսեփյանի խնամին է, «Նուշիկյան ասոցիացիայի» տնօրեններից), Գևորգյանն ասաց. «Արդար և թափանցիկ ընտրությունների հույս ունեմ: Facebook սոցիալական ցանցում նույնիսկ ողջունել եմ իմ մրցակցին»:
Ամփոփելով՝ ԱՐՄԱԿԱԴ գիտական ցանցի հիմնադիրը նշեց, որ անգամ ընտրություններում չհաղթելու դեպքում, իր տարիքի և նոր մտածողության գործոնները կարող են միջավայր ու մթնոլորտ փոխել:
