Իսպանիայի առաջնության 17-րդ տուրն ավարտվեց «Խետաֆե»-«Ռեալ» խաղով: Հանդիպման 11-րդ րոպեին Ռոնալդուի իրացրած 11 մետրանոց հարվածը առաջ մղեց արքայական ակումբին։ 8 րոպե անց Օզիլը կրկնապատկեց հաշիվը: Թվում էր` «Ռեալ»-ը հերթական հեշտ հաղթանակը կտանի, բայց Խոսե Միգելի սաները չհանձնվեցին, և 29-րդ րոպեին Պարեխոի հիանալի անցումն ավարտվեց տպավորիչ հարվածով: Հանդիպման հաշիվը դեռ առաջին խաղակեսում կարող էր հավասարվել, բայց «Խետաֆե»-ի հարձակվողները մի քանի անգամ վրիպեցին նպաստավոր դիրքերից: Երկրորդ խաղակեսի հենց սկզբից տանտերերի գրոհները շարունակվեցին, բայց ամեն անգամ չէր ստացվում եզրափակիչ հարվածը, որոշ դեպքերում էլ Կասիլիասն էր հրաշալի գործում, և, ինչպես սովորաբար լինում է նման դեպքերում, մադրիդցիները հակագրոհի արդյունքում հարվածային դիրք դուրս բերեցին Ռոնալդուին, ում հարվածից հետո հաշիվը դարձավ 1:3:
«Ռեալ»-ի հակագրոհները գնալով ավելի վտանգավոր էին դառնում: Նրանցից մեկի ժամանակ Դի Մարիան ու Բենզեման երկուսով հայտնվեցին միայնակ Կոդինայի դիմաց և անհասկանալի կերպով չկարողացան գրավել վերջինիս դարպասը: Ամեն ինչ փոխվեց Արբելոայի հեռացումից հետո: Հիմնական ժամանակի ավարտից 8 րոպե առաջ «Ռեալ»-ի կենտրոնական պաշտպանը կոպիտ խաղի համար պատժվեց երկրորդ դեղին քարտով: Հանդիպման մնացած ժամանակում «Խետաֆե»-ն գրոհում էր, իսկ «Ռեալ»-ը պաշտպանվում ու ժամանակը ձգձգելու առիթը բաց չէր թողնում: Խոսե Միգելի սաներն ի վերջո կարողացան կրճատել հաշվի տարբերությունը, բայց ավելին անել նրանց չհաջողվեց: Ժոզե Մոուրինյոյի «Ռեալ»-ը տարավ այս մրցաշրջանի իր ամենադժվար հաղթանակը: Երեկվա մյուս հանդիպումներում գրանցվեցին հետևյալ արդյունքները. «Ատլետիկո»-«Ռասինգ»` 0:0, «Մալյորկա»-«Հերկուլես»` 3:0, «Վիլյառեալ»-«Ալմերիա»` 2:0, «Սարագոսա»-«Ռեալ Սոսյեդադ»` 2:1: