Առավոտյան ժամերից սկսած, ոչ անմիջականորեն, բայց ընտրախախտումների ականատեսն ենք դարձել: «Առաջին լրատվական»-ին այս մասին տեղեկացրեց ԱԺ «Ժառանգություն» խմբակցության պատգամավոր Արմեն Մարտիրոսյանը`խոսելով Հրազդանի քաղաքապետի ընտրությունների շուրջ:
«Եղել են կնիքներ, որոնք շատ թաց են եղել, այսինքն` օգտագործվածի տպավորություն են թողել: Մի շարք տեղամասերում թանաքների գույնն են փոխել` նման խախտումներից խուսափելու համար: Տեղամասերից մեկում երկու քվեաթերթիկ է տրվել, որը, բարեբախտաբար, վստահված անձի կողմից նկատվել է, և այդ քվեաթերթիկներն անվավեր են ճանաչվել:
Ցուցակի ենք ականատես եղել, որտեղ անձանց անուններ են եղել անունների դիմաց մինուս-պլյուս նշաններով, կար գրառում, որ սասունական է, կար գրառում, որ անհրաժեշտ է օգնել»,- նշեց Ա. Մարտիրոսյանը`հավելելով, որ կան վկայություններ, որ ընտրակաշառքներ են բաժանվել, և որոշ քաղաքացիներ նույնիսկ նեղացել են, որ իրենց գումար չեն բաժանել: Պատգամավորն ընդգծեց, որ ադմինիստրատիվ ռեսուրսը` համայնքները, որոնք պատկանում են քաղաքապետարանին, օգտագործվել են ոչ ըստ օրենքի: