Հրազդանի քաղաքապետի ընտրություններն, արդեն մի քանի ժամ է, մեկնարկել են, բայց արդեն քաղաքապետի թեկնածու Սասուն Միքայելյանի վստահված անձինք ընտրակեղծիքներ են արձանագրել: «Առաջին լրատվական»-ին այս մասին պարզաբանումներ ներկայացրեց քաղաքապետի թեկնածու Սասուն Միքայելյանի նախընտրական շտաբի պետ Հակոբ Ավագումյանը:
Նա նշեց, որ ընտրական գործընթացը սկսվել է հետևյալ արձանագրություններով. «Մեր վստահված անձանց կողմից արձանագրվել է, որ որոշ տեղամասերում կնիքները չեն օգտագործվել: Արձանագրվել են խախտումներ տեղամասային հանձնաժողովներում, և մի տեղամասում մեր պահանջով փոխվել է թանաքի գույնը, որպեսզի կասկածը վերանա, իսկ մնացած տեղամասերում այս հարցն անուշադրության է մատնված, սակայն արձանագրվել է գրանցամատյաններում»:
Նշենք, որ յուրաքանչյուր քվեարկողի անձնագրի վերջին էջում պետք է կնիք դրվեր, որպեսզի երկրորդ անգամ Հրազդանի բնակիչը հնարավորություն չունենար քվեարկելու: Ս. Միքայելյանի նախընտրական շտաբի պետը նաև հավելեց, որ երեկ, երբ ընտրատարածքային հանձնաժողովը տեղամասերին բաժանում էր քվեաթերթիկները, անձնագրում դրոշմի համար նախատեսված կնիքները չեն տրվել:
«Սա ընտրական հանձնաժողովի 66-րդ հոդվածի 4-րդ կետի իմպերատիվ պահանջ է: Մենք բողոքարկել ենք ընտրատարածքային հանձնաժողով, իսկ ընտրատարածքային հանձնաժողովը մերժել է մեր բողոքը, և բողոք ենք ներկայացրել նաև վարչական դատարան:
Երեկ երեկոյան մեր հայցը մերժվել է պատճառաբանությամբ, որ 66-րդ հոդվածի 5-րդ կետն ասում է, որ այդ թանաքը պետք է լինի տասներկու ժամ անց անհայտացող թանաք»,- նշեց Հ. Ավագումյանը`հավելելով, որ անցումային դրույթում գրված է, որ այս հոդվածի հինգերորդ կետն օգտագործվելու է առաջին համապետական ընտրություններից սկսած: Այս պահի դրությամբ` սրանք ամենակոպիտ օրենքի խախտումներն են` արձանագրված Սասուն Միքայելյանի նախընտրական շտաբի պետի կողմից:
Հիշեցնենք, որ ընդդիմադիր ՀԱԿ անդամ Սասուն Միքայելյանը և գործող քաղաքապետ ՀՀԿ անդամ Արամ Դանիելյանը երկու օր առաջ ավարտել էին իրենց նախընտրական հանդիպումները, իսկ այսօր սպասում են քվեարկության նախնական արդյունքներին:
Հրազդանի գործող քաղաքապետը, արդեն տասը տարի է, ղեկավարում է Հրազդանը, իսկ ընդդիմության թեկնածու Սասուն Միքայելյանը քաղաքապետ է եղել 1996-1999թթ.: Երկու թեկնածուներն էլ Հրազդանի բնակիչներին խոստանում են բարեկեցիկ և արժանապատիվ կյանք:
