«2006 թվականին, երբ «Մայքրոսոֆտ»-ը Հայաստանում ներկայացուցչություն բացեց, ծրագրահենությունը այստեղ 96% էր: Այսօր այն 90% է»,- «Առաջին լրատվական»-ի հետ զրույցում ասաց «Մայքրոսոֆտ»-ի հայաստանյան ներկայացուցչության ղեկավար Գրիգոր Բարսեղյանը: ՀՀ կառավարությունն այսօր մի շարք կտրուկ քայլեր է իրականացնում հեղինակային իրավունքի պաշտպանության ուղղությամբ: Մասնավորապես` մարտի 1-ից ուժի մեջ կմտնի մի օրենք, ըստ որի՝ բոլոր կրիչները, սկավառակները պետք է հատուկ դրոշմանիշներով պիտակավորված լինեն, ինչը կհավաստի դրանց օրինականությունը: «Ես լավատեսորեն եմ մոտենում, թեև սա շատ կտրուկ ու խիստ քայլ է: Նմանատիպ փորձ շատ քիչ կա աշխարհում: Բայց պետք էր հաշվի առնել այն աղետալի վիճակը, որ կա մեր երկրում այս բնագավառում: Այն է` այս բնագավառի արտադրանքի հազիվ 10%-ն է օրինական: Նման իրավիճակում մեծ կորուստներ ունի առաջին հերթին պետությունը, որովհետև հարկման դաշտից դուրս է մնում լուրջ շրջանառություն` տասնյակ միլիոնավոր դոլարներով չափվող, բացի այդ՝ ավելի մեծ կորուստներ են ունենում իրավատերերը, հեղինակները, ստեղծողները, ինչն անթույլատրելի է: Եթե մենք չպաշտպանենք մեր պետության մեջ ստեղծագործական ներուժ ունեցող մարդկանց, ապա այդ մարդիկ չեն ստեղծագործի այստեղ, այլ պարզապես կլքեն երկիրը` գնալով այնտեղ, որտեղ իրենց մտավոր արտադրանքը պաշտպանված է: Մյուս կողմից էլ` արտասահմանյան ներդրումներ չեն գա Հայաստան, քանի որ ցանկացած նոր տեխնոլոգիա, գաղափար, բրենդ Հայաստան բերողը պետք է վստահ լինի, որ պաշտպանված են իր հեղինակային իրավունքները: Եթե մենք խոսում ենք այն մասին, որ գիտելիքի վրա հիմնված տնտեսություն ենք կառուցելու, ապա, առանց հեղինակային իրավունքի պաշտպանության, դա անիրատեսական է»,- ասում է Գ. Բարսեղյանը: Նրա հետ հարցազրույցն ամբողջությամբ 1in.am-ում կտեղադրվի առաջիկայում: