Սիրիայում տիրող իրավիճակը պետք է դառնա Միջազգային քրեական դատարանի քննարկման առարկա: Այս մասին հայտարարել է Միավորված ազգերի կազմակերպության մարդու իրավունքների գերագույն կոմիսարի ներկայացուցիչ Ռուպերտ Կոլվիլը:
Ինչպես հաղորդում է Reuters-ը, նա ընդգծել է, որ Հաագայի դատարանի առաջ պետք է կանգնեն Սիրիայի պաշտոնատար անձինք, ովքեր մեղավոր կամ մասնակից են մարդկության դեմ հանցագործություններում: «Մենք ենթադրում ենք (և արդեն արել ենք համապատասխան հայտարարություն և կկրկնենք դա), որ Սիրիայում դրությունը պետք է լինի ՄՔԴ ուսումնասիրության առարկա,- ասել է Կոլվիլը: – Միայն այդ դեպքում կարելի է ազդանշան ուղարկել նրանց, ովքեր պատասխանատու են դեպքերի նման դասավորության համար»:
Ակնկալվում է, որ ՄԱԿ-ի մարդու իրավունքների գլխավոր կոմիսար Նավաթենեմ Պիլայը փետրվարի 13-ին ՄԱԿ-ի Գլխավոր ասամբլեայում հանդես կգա Սիրիայի վերաբերյալ զեկույցով:
Ավելի վաղ Պիլայը կոչ էր արել միջազգային հանրությանը անհապաղ քայլեր ձեռնարկել Սիրիայի քաղաքացիական բնակչությանը պաշտպանելու համար:
Հիշեցնենք, որ ՄԱԿ-ի ներկայացրած վերջին զեկույցի համաձայն՝ Սիրիայում շուրջ մեկ տարի շարունակվող արյունահեղությունների զոհ է դարձել ավելի քան 5000 մարդ:
Անդրադառնալով փետրվարի 4-ից Սիրիայի Հոմս քաղաքում շարունակվող ռմբակոծություններին՝ Կոլվիլն ասել է. «Հոմս քաղաքում զոհերի թիվն ամեն օր աճում է, այնտեղ իրոք աղետալի դրություն է: Բայց մենք չենք կարող նույնիսկ մոտավոր թիվ ներկայացնել և ասել, որ դա պաշտոնական է»: