Ռիո դե Ժանեյրոյի ոստիկանությունը ձերբակալել է կառնավալից մեկ շաբաթ առաջ կազմակերպված ոստիկանության և անվտանգության աշխատակիցների գործադուլի 59 նախաձեռնողների: Այս մասին հաղորդում է RIA-Novosti-ն՝ վկայակոչելով գերատեսչության մամուլի ծառայությունը:
Փրկարարների և հրշեջների անորոշ ժամկետով գործադուլը Ռիո դե ժանեյրոյում սկսվել է երեկ: Ռազմական և քաղաքացիական ոստիկանության, ինչպես նաև հրշեջ ծառայությունների աշխատակիցների 30%-ը դուրս չի եկել աշխատանքի: Ակցիայի մասնակիցների հիմնական պահանջն է աշխատավարձերի բարձրացումը:
Ոստիկանության ղեկավարությունից հայտնել են, որ ակցիայի կազմակերպիչներից 59-ը ձերբակալվել են, ավելի քան 100 ոստիկանի մեղադրանք է ներկայացվել կարգապահական խախտումների համար:
Գործադուլի առաջին օրը խաղաղ է եղել և լուրջ խախտումներ չեն գրանցվել: Այնուամենայնիվ գործադուլը կարող է վտանգի տակ դնել փետրվարի 17-ին կայանալիք կառնավալը, որի ժամանակ քաղաք են այցելում մեծ թվով զբոսաշրջիկներ:
