Երեկ «Առաջին լրատվական»-ին հաջողվեց կապվել «Հազարամյակի մարտահրավերներ» կորպորացիայի վաշինգտոնյան գրասենյակի հետ, որտեղից մեզ չափազանց կարեւոր տեղեկություն հայտնեցին:
Ինչպես հայտնի է, 2009թ. հունիսի 10-ի նիստում «Հազարամյակի մարտահրավերներ» կորպորացիան դադարեցրել էր ճանապարհաշինական ենթածրագրի ֆինանսավորումը` այն հիմնավորմամբ, որ Հայաստանի կառավարության կատարած քայլերը չեն համապատասխանում «Հազարամյակի մարտահրավերներ» կորպորացիայի երեք չափանիշներից մեկին` արդար կառավարման չափանիշներին:
Ըստ էության, Հայաստանն այս որոշումից հետո մինչեւ այս պահը գտնվում էր operational hold կարգավիճակում: Ասել է թե` պաշտոնական Վաշինգտոնը անցած մեկ տարվա ընթացքում պետք է ուսումնասիրեր Հայաստանի իշխանությունների կողմից պահանջների կատարումը եւ դրական եզրահանգման պարագայում, մինչեւ Հայաստանում ծրագրի պաշտոնական ավարտը` 2011թ. սեպտեմբեր ամիսը, ճանապարհաշինական ենթածրագրի ֆինանսավորումը կարող էր տրամադրել: Հիշեցնենք, որ Հայաստանի հետ կնքված համաձայնագրով «Հազարամյակի մարտահրավերներ» կորպորացիան Հայաստանին տրամադրում է 235, 6 միլիոն դոլար, որից ճանապարհների ենթածրագրի համար ընդհանուր առմամբ նախատեսվում էր հատկացնել շուրջ 68 միլիոն դոլար:
Սակայն երեկ «Հազարամյակի մարտահրավերներ» կորպորացիայի Վաշինգտոնի գրասենյակի «Առաջին լրատվական»-ի աղբյուրը հավաստիացրեց, որ Հայաստանին ճանապարհաշինական ենթածրագրի ֆինանսավորումը չի տրամադրվելու եւ նախատեսված գումարը կանցնի ամերիկյան գանձարան: Ստացվում է, որ ԱՄՆ-ում ձերբակալված հանցավոր խմբի գործունեությունը, մասնավորապես գումարների մի մասը Հայաստանում անշարժ գույքի եւ բիզնեսի ոլորտում ներդնելու հանգամանքը նման որոշում ընդունելու լուրջ փաստարկ է հանդիսացել պաշտոնական Վաշինգտոնի համար:
«Առաջին լրատվական»-ին հաջողվել է պարզել նաեւ, որ առաջիկայում նախատեսված է «Հազարամյակի մարտահրավերներ» կորպորացիայի վարչության նիստ, որի ընթացքում այս որոշումը պաշտոնապես կվավերացվի: