1884թ. այս օրը Լոռու Արդվին գյուղում ծնվեց հայ մեծավաստակ գիտնական, հայագետ և հնագետ Աշխարհաբեկ Քալանթարը (Լորիս Քալանթարը):
Պետերբուրգում աշակերտել է Նիկողայոս Մառին, ուսանելու տարիներից ներգրավվել Անիի պեղումներին։ 1914թ. դարձել է Սանկտ Պետերբուրգի Ասիական թանգարանի վարիչ։ 1914թ. Մառն իր բացակայության ժամանակ նրան է վստահել Անիի պեղումների ղեկավարությունը և այդ աշխատանքների շնորհիվ են այսօր Հայաստանում պահպանվում Անիի հնագիտական նյութերը, որոնք գիտնականը փրկեց 1918թ.։ Մինչ այդ՝ 1917-ին, Նիկողայոս Ադոնցի հետ մասնակցել էր Վանի հնագիտական երկրորդ արշավանքներին։
Ա. Քալանթարը ԵՊՀ-ի յոթ հիմնադիր դասախոսներից էր, ուր նաև ստեղծեց հնագիտության ամբիոնը։ 1922թ. հրատարակեց հնագիտության առաջին հայերեն դասագիրքը, ինչպես և հիմնադիրներից մեկը եղավ Հայաստանում հնությունների պահպանության կոմիտեի։ Նա ղեկավարել է բազմաթիվ արշավախմբեր ու պեղումներ, իբրև հմուտ մանկավարժ պատրաստել ու կրթել մասնագետների մի քանի սերունդներ։
Ա. Քալանթարի բեղմնավոր գիտական և մանկավարժական գործունեությունն ընդհատվեց ստալինյան բռնաճնշման տարիներին՝ 1938թ.:
Մահացավ 1942թ. աքսորում։
2006թ. Երևանի Տերյան փողոցի թիվ 62 տան առջև բացվեց Քալանթարին նվիրված հուշատախտակ։ Ա. Քալանթարն ապրել է այդ տանը 1935-1938թթ.: