1829թ. այս օրը Թեհրանում սպանվեց ռուս դրամատուրգ, բանաստեղծ, դիվանագետ, «Խելքից պատուհաս» (1824-1828թթ., Горе от ума) կատակերգության հեղինակ Ալեքսանդր Սերգեևիչ Գրիբոյեդովը:
Գրողը ծնվել է 1795թ. Մոսկվայում, 1810-ին ավարտել Մոսկվայի համալսարանի բանասիրական և իրավաբանական ֆակուլտետները, ապա սովորել նաև ֆիզիկամաթեմատիկական ֆակուլտետում։
Ուսանողական տարիներին շփվել է ապագա դեկաբրիստների (1825թ. դեկտեմբերին ինքնակալության դեմ ապստամբած ռուս հեղափոխականներ) հետ: 1815թ. բեմադրել և հրատարակել է իր առաջին գործը` «Երիտասարդ ամուսիններ» կատակերգությունը:
1819թ. փետրվարին այցելել է Էջմիածնի վանք, Մատենադարան, ծանոթացել պատմական հուշարձաններին: 1822թ. Թիֆլիսում եղել է Կովկասի ռուսական զորքերի հրամանատարությանն առընթեր դիվանագիտական մասի քարտուղարը: Գեներալ Պասկևիչի բանակում մասնակցել է Երևանի, Սարդարապատի, Նախիջևանի ազատագրմանը:
1827թ. Երևանի բերդի առումից հետո պարգևատրվել է «Երևանի գրավման համար» մեդալով և նույն թվականի դեկտեմբերին սարդարի պալատի դահլիճում, հեղինակի ներկայությամբ, ռուս սպաների ուժերով առաջին անգամ բեմադրվել է «Խելքից պատուհաս» կատակերգությունը: Ականատեսները պատմել են, որ Գրիբոյեդովը շատ հուզված է եղել, ընդմիջումներին մոտեցել է դերակատարներին, ոգևորել նրանց:
1828թ. փետրվարի 10-ին Գրիբոյեդովը մասնակցել է Թուրքմենչայի պայմանագրի կնքմանը, նրա առաջարկությամբ մտցվել է 15-րդ կետը, որով 40 հազար պարսկահայերի թույլատրվել է ներգաղթել Արևելյան Հայաստան: 1828թ. ապրիլի 25-ին Գրիբոյեդովը նշանակվում է լիազոր-մինիստր Թեհրանում` նկատի ունենալով նախորդ բանակցությունների ժամանակ նրա ցուցաբերած դիվանագիտական բարձր ունակությունները և տեղի պայմաններին լավատեղյակությունը: Սակայն Գրիբոյեդովն այդ նշանակումը համարեց «քաղաքական աքսոր»: Չանցած մեկ տարի` 1829թ. փետրվարին շահական Պարսկաստանի ռեակցիոն շրջանների հրահրմամբ, մոլեռանդ ամբոխը հարձակվում և սպանում է Թեհրանի ռուսական դեսպանատան 54 աշխատողներին, այդ թվում և մինչև վերջ խիզախորեն դիմադրող Գրիբոյեդովին:
Թիֆլիսի ճանապարհին, Դվալի (այժմ Պուշկինի) լեռնանցքում Ալեքսանդր Պուշկինը հանդիպել է Ա. Գրիբոյեդովի դիակը փոխադրող սայլվորներին: Հանդիպման վայրում կանգնեցված է աղբյուր-հուշարձան:
Էջմիածնի Մայր տաճարում հոգեհանգստի պատարագ է մատուցվել նրա հիշատակին: «Խելքից պատուհասը» բազմիցս բեմադրվել է հայկական թատրոններում:
Երևանում 1975թ. կանգնեցվել է Գրիբոյեդովի արձանը:
Երևանում և ՀՀ այլ քաղաքներում կան նրա անվան փողոցներ և դպրոցներ:
