Այսօր Կալիֆոռնիայի նահանգապետ Առնոլդ Շվարցենեգերն իր վերջին օրն է անցկացնում այդ նահանգի ղեկավարի պաշտոնում: Նահանգապետի պաշտոնը նա զբաղեցրել է վերջին 7 տարիների ընթացքում:
Նրան կփոխարինի դեմոկրատ Ջերի Բրաունը, որը 1975-1983թթ. արդեն զբաղեցրել է նահանգապետի աթոռը:
Ինչպես նշում են ամերիկյան պարբերականները, Շվարցենեգերի կառավարման շրջանը միանշանակ չի գնահատվում փորձագետների կողմից: Նա լքում է պաշտոնն այն պահին, երբ նահանգը գտնվում է տնտեսական ծանր ճգնաժամի մեջ. արդեն կրճատվել են բազմամիլիարդանոց սոցիալական ծրագրեր, որպեսզի նահանգը սնանկ չհայտարարվի: Անցած ապրիլին «Քաղաքացիներ հանուն պատասխանատվության և էթիկայի» հանձնաժողովը «Ոսկե նահանգ» տիտղոսը կրող Կալիֆոռնիայի ղեկավարին ընդգրկել է երկրի 11 ամենավատ նահանգապետերի ցուցակում:
Հավանականություն կա, որ նահանգապետի պաշտոնից հետո Առնոլդ Շվարցենեգերն Օբամայի վարչակազմում զբաղվի բնապահպանական խնդիրներով: Այս ոլորտի խնդիրներին Շվարցենեգերը մեծ ուշադրություն է դարձրել իր պաշտոնավարման 7 տարիներին:
