Հունվարի 1-ից Էստոնիան դարձավ եվրագոտու 17-րդ անդամ երկիրը: Եվրոն կփոխարինի էստոնական կրոնին, որը շրջանառվում էր 1992թ.-ից` ԽՍՀՄ փլուզումից հետո և համարվում էր բավականին վստահելի արժույթ: Կրոնը եվրոյի հետ հավասար կմնա շրջանառության մեջ հունվար ամսվա առաջին երկու շաբաթների ընթացքում, այնուհետև բանկերում այն հեշտությամբ կփոխանակվի եվրոյի: Բանկային հաշիվներն արդեն իսկ եվրոյացվել են: Իսկ կրոնի փոխանակումը սկսվել էր 2010թ.-ի դեկտեմբերից: Էստոնիայի իշխանությունները եվրագոտի մտնելով փորձում են արագացնել եվրաինտեգրման գործընթացը երկրում:
Այս մասին հաղորդում է France Presse գործակալությունը:
Փաստորեն, մերձբալթյան այս երկիրը դարձավ Խորհրդային Միության նախկին հանրապետություններից առաջինը, որը մտավ եվրագոտի: Էստոնիայի բնակչությունը միանշանակ չի ընդունել եվրագոտի մտնելու փաստը: Նրանց մի մասը մտահոգված է, որ գները կտրուկ կաճեն, քանի որ նմանատիպ ապրանքները Էստոնիայում զգալիորեն ցածր են, քան եվրագոտու մյուս երկրներում: Բացի այդ, էստոնացիներին մտահոգում են նաև Հունաստանի և Իռլանդիայի տնտեսական խնդիրները, քանի որ դրանք կարող են իրենց հետևից քաշել նաև եվրագոտու մյուս անդամ երկրների տնտեսությունները և բացասաբար ազդել դրանց վրա:
Տեղեկացնենք նաև, որ Էստոնիան 2004թ.-ից Եվրամիության, իսկ 2010թ.-ից Շենգենի տարածքի անդամ երկիր է:
