Քրեական աշխարհի լուրեր հաղորդող հայտնի Prime Crime լրատվական գործակալությունն ամփոփել է քրեական աշխարհի 2010թ.-ի նորությունները, ինչպես նաև փորձել է կանխատեսել, թե ինչ զարգացումներ կլինեն այդ «աշխարհում» 2011թ.-ին:
Ըստ գործակալության` անցած տարի «գողական» կլաններին այդպես էլ չհաջողվեց հաշտություն կնքել: Ավելին, այդ հակամարտությունն էլ ավելի սրվել է: Ընդ որում` պայքարի թատերաբեմը Ռուսաստանից տեղափոխվել է արտերկիր, որտեղ տարբեր խմբեր մեկը մյուսի ներկայացուցչի դեմ գրոհներ են իրականացրել:
Անկասկած, քրեական աշխարհի համար նշանակալից էր Դեդ Հասանի դեմ մահափորձը: Ըստ գործակալության` եթե նա մահանար, ապա այդ իրադարձությունը շրջադարձային կլիներ «գողական աշխարհի» ներկայացուցիչների համար: Սակայն Դեդը կարողացավ «վերակենդանանալ», ապաքինվել, և ամեն ինչ վերադարձավ հին հուն: Սկզբում մահափորձը բարդում էին մեկ այլ «գողի»` Մերաբ Սուխումսկու վրա, սակայն հետզհետե պարզ դարձավ, որ պատվիրատուին պետք է փնտրել «գողական աշխարհից» դուրս: Մինչև հիմա Դեդ Հասանը չի նշանակել իր «ժառանգորդին»: Ավելին, նա շարունակում է ապավինել «բաժանիր, որ տիրես» սկզբունքին: Նա կարծես ցանկանում է իր հետնորդ նշանակել այդ «աշխարհում» հայտնի Միրոնին կամ Յուրա Լազարևսկուն, սակայն գործակալության վերլուծաբանը խորհուրդ է տալիս չմոռանալ նաև Լաշա Ռուսթավսկուն և հայազգի «Էդիկ Օսետրինա» մականունով Էդուարդ Ասատրյանին:
Դեդ Հասանին այս պահին մտահոգում է «գողական աշխարհի» «դեմոգրաֆիական» վիճակը, քանի որ աշխարհում գոյություն ունեցող 400 «օրենքով գողերի» մեծ մասը տարիքն առած են կամ հիվանդություններով են տառապում: Միայն 2010թ. մահացել է 17 «օրենքով գող», որոնցից երեքը սպանվել են: Ըստ գործակալության` մահացածների մեծ մասը Դեդ Հասանի մտերիմներն էին, իսկ նրա համար լուրջ կորուստ են Արմեն Կանևսկոյի և Լև Մարնեուլսկու մահերը:
Հայտնի է նաև, որ 2008թ. նոյեմբերից «օրենքով գող» են կարգվել 11 հոգի, իսկ այդ ընթացքում մահացել են 33-ը: Ըստ գործակալության` նոր «գողերի» ընտրության հարցում Դեդ Հասանը պետք է մեծ ուշադրություն դարձնի թեկնածուների ազգությանը և ծննդավայրին, որպեսզի չկորցնի իր ազդեցությունը:
Տարին նաև հատկանշական է եղել աղմկահարույց ձերբակալություններով: Կալանավորվել և դատապարտվել են անպիսի հայտնի «օրենքով գողեր», ինչպիսիք են Լուան, Սարգիսը, Չիլկան, Մամեդն ու Արթուրը: Ձերբակալվել են այնպիսի հեղինակություններ, ինչպիսիք են Տյուրիկն ու Գիա Քութաիսկին: Բացի այդ, իսպանական դատարանը 7 տարվա ազատազրկման է դատապարտել Դեդից հետո ամենահայտնի «գողերից» մեկին` Զախար Քալաշովին, որն ավելի հայտնի է «Շաքրո Մոլոդոյ» մականունով: Սակայն սա վերջը չէ. պատիժը կրելուց հետո իսպանական իրավապահները պատրաստվում են Շաքրոյին հանձնել վրացական իրավապահներին, որտեղ «գողը» հեռակա կարգով դատապարտվել է 18 տարվա ազատազրկման:
Տարիել Օնիանին, որը հայտնի է «Տարո» մականունով, նույնպես չի խուսափել պատասխանատվությունից: Նրան Ռուսաստանում դատապարտել են 10 տարվա ազատազրկման:
Գործակալությունն առանձնացրել է նաև հայազգի «Զապի» (Արմեն Սողոյան.– 1in.am) արդարացումը Չեխիայում, ինչպես նաև Արմեն Ղազարյանի` «Պզոյի» ձերբակալությունը ԱՄՆ-ում` նշելով, որ չեխական նախադեպը կարող է կրկնվել նաև «Պզոյի» գործով, քանի որ դատախազությունը դեռ չի կարողանում անհրաժեշտ ապացույցներ հավաքել:
Գործակալությունը հայտնում է, որ քրեական աշխարհի համար պետք է մտահոգիչ լինի նաև այն փաստը, որ անցած տարի մոտ մեկ տասնյակ եվրոպական երկրներում տեղի են ունեցել «օրենքով գողերի» ձերբակալություններ, և սպասվում է, որ այդ միտումը կշարունակվի: