«Սինջար» եզդիների ազգային միավորում հասարակական կազմակերպությունը նախօրեին բաց նամակ է հղել Հայաստանի արդարադատության նախարար Հրայր Թովմասյանին` «Նուբարաշեն» ՔԿՀ-ից Էրեբունի բժշկական կենտրոն տեղափոխված, ազգությամբ եզդի, Մյասնիկյան պողոտայում իրավապահների կողմից վնասազերծված ծանր հանցագործությունների մեջ կասկածվող ավազակային խմբի անդամներից 19-ամյա Քյարամ Ամոյանի վերաբերյալ:
Նամակում մասնավորապես նշվում է, որ «Սինջար» եզդիների ազգային միավորում հասարակական կազմակերպությունը անհանգստացած է երիտասարդի առողջությամբ, և կազմակերպությանը չեն բավարարում ՀՀ արդարադատության նախարարության քրեակատարողական վարչության հասարակայնության հետ կապերի բաժնի հավաստիացումներն այն մասին, որ Քյարամ Ամոյանի առողջության վատթարացումը կապված չէ ՔԿՀ-ում որևէ միջադեպի հետ:
Կազմակերպությունը նամակով պահանջում է, որ արդարադատության նախարարությանը և «Նուբարաշեն» ՔԿՀ-ի ղեկավարությանը հանդես գան մանրամասն բացատրությամբ և ներկայացնեն կատարվածը:
«Առաջին լրատվականը» փորձեց կապ հաստատել «Սինջար» եզդիների ազգային միավորում հասարակական կազմակերպության հետ, սակայն նրանց ո՛չ հեռախոսահամարը, ո՛չ էլ հասցե կա որևէ տեղ:
Եզդիական համայնքի մի շարք ներկայացուցիչների հետ զրույցում նախարարին նամակ ուղարկած անհայտ ՀԿ-ի առնչությամբ մի շարք հետաքրքիր բացահայտումներ եղան: Մասնավորապես՝ պարզվում է, որ «Սինջար» ՀԿ-ն իրականում նախկինում «Նինդյա» կոչված կազմակերպության անվանափոխված տարբերակն է, որի ղեկավարությունը գողական աշխարհի ներկայացուցիչներ են: Արդեն հայտնել ենք, որ Քյարամ Ամոյանը հայտնի գող եզդի Ճակոյի եղբորորդին է։ Թեև Ճակոն մահացել է, սակայն նրա գործն այսօր, եզդիների խոսքերով, շարունակում է որդին:
Եզդիական համայքնի ներկայացուցիչները համոզված են, որ քրեակատարողական հիմնարկում նրան ոչ ոք վնասել չէր կարողանա, պարզապես հիմա 19-ամյա Քյարամի ազատման հարցով սկսել են ակտիվորեն զբաղվել հենց «գողերը», և ստիպված են հարմար պատճառներ ստեղծել, քանի որ բանդայի գործը բավական մեծ աղմուկ է հանել, և տղային գաղտնի ազատելու հավանականությունը շատ փոքր է:
Քյարամ Ամոյանի ընտանիքին ամիջականորեն ճանաչող եզդիները նշում են, որ որքան էլ այսօր երիտասարդի քույրը բոլորին ասում է, թե եղբայրը նախկինում էլ է ուղեղի հետ կապված հիվանդություն ունեցել, իրենք, համենայն դեպս, նման բան չեն հիշում, ոչ մեկը նման բան չի լսել, իսկ եզդիների համայնքում այդպիսի լուրերն արագ են տարածվում:
Ի դեպ, եզդիները նշում են, որ հենց «Սինջար» անվանումը նրանց, այսպես ասած, «գողական կոդն» է, և գողերն են այնտեղ հավաքվում ու քննարկումներ անում: Եզդիներից մեկն էլ «Առաջին լրատվական»-ին հայտնեց, որ, ըստ երևույթին, կազմակերպության մեջ է նաև ինչ-որ Շարոյան, որը նախկինում քննիչ է եղել, սակայն նրան հեռացրել են համակարգից:
Ինչպես «Առաջին լրատվականն» արդեն հայտնել էր` բանդայի գործով ամբաստանյալ «Եզդի Ճակոյի» եղբոր 19-ամյա որդու վիճակն այս պահին կայուն է:
Փետրվարի 8-ին նա «Նուբարաշեն» քրեակատարողական հիմնարկից տեղափոխվել է Էրեբունի բժշկական կենտրոնի վերակենդանացման բաժանմունք, որտեղ պարզվել է, որ Քյարամ Ամոյանն ուղեղի արյան զեղում է ստացել:
ՀՀ արդարադատության նախարարության քրեակատարողական վարչության հասարակայնության հետ կապերի բաժնից «Առաջին լրատվական»-ին հավաստիացրել են, որ Ամոյանի առողջական վիճակի վատթարացումը քրեակատարողական հիմնարկում տեղի ունեցած որևէ միջադեպով պայմանավորված չէ: 19-ամյա ամբաստանյալը մինչ ազատազրկվելն էլ ունեցել է անոթային խնդիրներ, գլխի վիրահատության է ենթարկվել տարիներ առաջ, իսկ այժմ նրա վիճակը ուղղակի վատթարացել է:
