«Նարեկացի» արվեստի միության հիմնադիր նախագահ Նարեկ Հարթունյանի կողմնակիցները բողոքի ակցիայի են դուրս եկել Պետեկամուտների շենքի առջև:
Նշենք, որ ՊԵԿ-ն ավելի վաղ հայտարարություն էր տարածել, թե Նարեկ Հարթունյանը հարկային չարաշահումները կատարել է Շուշիում տուն գնելու համար: Հարթունյանն իր հերթին հակադարձել էր, որ լուրերն իրականությանը չեն համապատասխանում, իսկ Շուշիում գնած տունը կիսաավերակ կառույց է:
Հիշեցնենք նաև, որ ՊԵԿ-ի քննչական վարչության վարույթում քննվող քրգործով «ՋԻ Էյջ Ստորիջ Էնթրփրայզս» ՍՊԸ տնօրեն Նարեկ Հարթունյանին, հաշվապահ Արթուր Գալստյանին 2011 թ. դեկտեմբերի 9-ին մեղադրանք էր առաջադրվել ՀՀ Քրեական օրենսգրքի 205 հոդվածի 2-րդ, 38-205 հոդվածի 2-րդ (առանձնապես խոշոր չափերով հարկերը, տուրքերը կամ պարտադիր այլ վճարումները վճարելուց չարամտորեն խուսափել) և 190 հոդվածի 2-րդ մասի 1-ին կետով (հանցավոր ճանապարհով ստացված եկամուտներն օրինականացնելը, որը կատարվել է խոշոր չափերով (փողերի լվացում)), իսկ ընկերության փոխտնօրեն Անի Մնացականյանին` 38-205 հոդվածի 2-րդ մասով (առանձնապես խոշոր չափերով հարկերը, տուրքերը կամ պարտադիր այլ վճարումները վճարելուց չարամտորեն խուսափելուն օժանդակել) և նրանց նկատմամբ, Երևանի Կենտրոն եւ Նորք Մարաշ վարչական շրջանների առաջին ատյանի դատարանի որոշմամբ, որպես խափանման միջոց էր կիրառվել կալանավորումը: Երկու օր անց, սակայն, փոխվել էր նրանց խափանման միջոցը, և նրանք ազատ էին արձակվել:
