Ինչպես հաղորդում է BBC-ն, ԱՄՆ պետքարտուղար Հիլարի Քլինթոնը և Վենեսուելայի նախագահ Ուգո Չավեսը կարճատև զրույց են ունեցել Բրազիլիայում, որտեղ մասնակցել են այդ երկրի նորընտիր նախագահի երդմնակալության արարողությանը: Նրանք ժպտացել են միմյանց, կատակել և զրուցել միասին մի քանի րոպե:
«Մենք ողջունել ենք միմյանց», ասել է Չավեսը օդանավակայանում` հայտնելով, որ նա (Քլինթոնը.– 1in.am) անկաշկանդ ժպտում էր, ինքն էլ նրան նույնկերպ է պատասխանել:
Հաշվի առնելով այն հանգամանքը, որ արդեն մի քանի տարի է երկու երկրների միջև հարաբերությունները ծայրահեղ լարված են, այս հանդիպումը կարելի է հատկանշական համարել: Անցած տարվա նոյեմբերին Չավեսը կտրուկ քննադատության էր ենթարկել Պետքարտուղարությանը և անձամբ նրա ղեկավարին` Հիլարի Քլինթոնին, քանի որ համացանցում հայտնված գաղտնի փաստաթղթերում Վենեսուելայի հասցեին շատ քննադատություն էր եղել: Իսկ վերջին մի քանի օրերին նոր դիվանագիտական սկանդալ էր ծագել, երբ Չավեսը հայտարարել էր, որ մուտքի վիզա չի տրամադրի ԱՄՆ դեսպանին: Վերջինս մինչև Վենեսուելա ժամանելը քննադատել էր այդ երկրում գործող ռեժիմը: