Ճապոնիայում բնակչության կողմից ալկոհոլի չարաշահման պատճառով երկիրը տարեկան կորցնում է մոտ 90 մլրդ դոլար: Այս մասին հաղորդում է ITAR-TASS գործակալությունը` հղում կատարելով առողջապահության, աշխատանքի և բարեկեցության նախարարության կողմից իրականացված հետազոտության արդյունքներին:
Ըստ հետազոտության խմբի ներկայացուցիչների` Ճապոնիան ծախսում է մոտ 3 տրիլիոն իեն` ալկոհոլի չարաշահումից առաջացած հիվանդությունների բուժման համար: Մոտավորապես նույնքան գումար կորցնում են այն ընտանիքները, որոնց աշխատող հայրը կամ մայրը մահացել են ալկոհոլի չարաշահումից: Միաժամանակ նշվում է, որ այս հիվանդության հետևանքով աշխատունակությունը նվազում է մոտ 21%-ով, ինչը միլիարդավոր դոլարների վնաս է հասցնում:
Գիտնականների հաշվարկով` ճապոնիայի տղամարդկանց մոտ 6%-ը և կանանց մոտ 2%-ը խոստովանում են, որ ալկոհոլային կախվածություն ունեն: Սակայն որոշ մասնագետներ ավելի տխուր թվեր են ներկայացնում:
Նշվում է, որ Ճապոնիայում հանդուրժողաբար են վերաբերվում ալկոհոլի չարաշահման խնդրին: Աշխատանքից հետո ծառայողների մի մասը պարտադիր գնում է ռեստորաններ` ալկոհոլ ընդունելու համար:
