Ըստ Wikileaks-ի հրապարակած նոր փաստաթղթերի, ԱՄՆ Պետքարտուղարությունն անընդհատ թուրք դիվանագետներից, ինչպես նաև Անկարայում ԱՄՆ դեսպանատնից ստացել է ուղերձներ, որտեղ Պետքարտուղարությունը զգուշացվում է Ցեղասպանության ճանաչման հետևանքների մասին:
2009թ. հոկտեմբերի 13-ին հայ-թուրքական արձանագրությունների ստորագրումից մի քանի օր անց Անկարայի դեսպանատնից նամակ է ուղղվել Պետքարտուղարություն, որտեղ դիվանագետը կարծիք է հայտնել Թուրքիայի` հարավկովկասյան տարածաշրջանում ունեցած դերակատարության վերաբերյալ: Ըստ դիվանագետի` Թուրքիան ցանկանում է զարգացնել իր` որպես տարածաշրջանային տերության դերը, իսկ կովկասյան տարածաշրջանի սառեցված հակամարտությունները խանգարում են դրան:
Հոկտեմբերի 10-ին Ցյուրիխում ստորագրված արձանագրությունները նշանակալի են տարածաշրջանի համար և կարող են լավ հիմք հանդիսանալ երկկողմ հարաբերությունների հաստատման համար և բացել փակ սահմանները:
Սակայն դիվանագետը միաժամանակ նշում է, որ Լեռնային Ղարաբաղի հակամարտության կարգավորման և 1915թ. Ցեղասպանության հիմնահարցերը (Ցեղասպանությունը փաստաթղթում նշված է չակերտներում.– 1in.am) կապված կլինեն երկկողմ կարգավորման հետ: Թուրքիան անընդհատ զգուշացնում է, որ 1915թ. դեպքերի որակումը որպես Ցեղասպանություն կարող է լուրջ քաղաքական խնդիրներ առաջացնել Թուրքիայում և ազդել թուրք-ամերիկյան երկկողմ հարաբերությունների վրա` քաղաքական, ռազմական, տնտեսական:
Մեկ այլ փաստաթղթում, որը նվիրված է ԱՄՆ պաշտպանության նախարարի այցին Թուրքիա, ասվում է, որ չնայած ստորագրված արձանագրություններին, երկու երկրներն էլ անհրաժեշտ քայլեր չձեռնարկեցին դրանք կյանքի կոչելու համար: Փաստաթղթում նշվում է, որ չնայած Լեռնային Ղարաբաղի հակամարտության մասին արձանագրություններում խոսք չկա, Թուրքիան շարունակում է հայ-թուրքական հարաբերությունները շաղկապել հայ-ադրբեջանական կարգավորման հետ: Դիվանագիտական փաստաթղթում կրկին նշվում է Ցեղասպանության ճանաչման վտանգների մասին: